ઓસ્ટ્રેલિયા ન્યુઝીલેન્ડ વચ્ચેની પહેલી વન ડે મેચ ખાલી સ્ટેડિયમમાં રમાડવામાં આવી હતી. કોરોનાવાયરસના કારણે ક્રિકેટ ઓસ્ટ્રેલિયાએ આ નિર્ણય લીધો હતો. પહેલી વન ડેમાં બેટ્સમેન વડે મારેલા એક શોટ દરમિયાન ફિલ્ડરે પોતે સ્ટેડિયમની અંદર જઈને બોલ શોધવો પડ્યો હતો. આ રમુજી પળનો વીડિયો વાઇરલ થઇ રહ્યો છે.
ઓસ્ટ્રેલિયા vs ન્યૂઝીલેન્ડ
મિચેલ માર્શ અને પેટ કમિન્સની શાનદાર બોલિંગ સામે ન્યુઝીલેન્ડ સિડની ક્રિકેટ ગ્રાઉન્ડ ખાતે રમાયેલી પ્રથમ વનડે મેચમાં ઓસ્ટ્રેલિયા દ્વારા આપાયેલ 259 રનના લક્ષ્યાંક સામે માત્ર 187 રન જ બનાવી શકી હતી અને મેચ 71 રને હારી ગઈ હતી.
માર્શ અને કમિન્સે ત્રણ-ત્રણ વિકેટ ઝડપી હતી. જોશ હેઝલવુડ અને લેગ સ્પિનર એડમ ઝામ્પાએ બે-બે વિકેટ લીધી હતી. ન્યુઝીલેન્ડ તરફથી ઓપનર માર્ટિન ગુપ્ટિલે 73 બોલમાં એક ચોક્કા અને 1 છગ્ગાની મદદથી 40 રન બનાવ્યા હતા. ટોમ લેથમે 40 બોલમાં ચાર ચોગ્ગાની મદદથી 38 રનનું યોગદાન આપ્યું હતું. કિવિ ટીમનો કોઇ પણ બેટ્સમેન પોતાની ટીમને જીત અપાવવા લાયક લાંબી ઇનિંગ રમી શક્યો ન હતો અને ટીમ 41 ઓવરમાં તંબુ ભેગી થઇ હતી.
આ પહેલા ટોસ જીત્યા બાદ પ્રથમ બેટિંગ કરવાનો નિર્ણય કરનાર ઓસ્ટ્રેલિયાએ 50 ઓવરમાં સાત વિકેટ ગુમાવી 258 રન બનાવ્યા હતા. ડેવિડ વોર્નર અને કેપ્ટન એરોન ફિંચે ટીમને મજબૂત શરૂઆત આપી હતી પરંતુ યજમાન ટીમ બહુ મોટો સ્કોર કરી શકી નહોતી.
Now these players would realize what pains gully cricket playing kids go through in India. The guy who has hit, has to fetch the ball. pic.twitter.com/F5Z8ydM7q8
વોર્નર અને ફિંચે પ્રથમ વિકેટ માટે 124 રનની ભાગીદારી નોંધાવી હતી. વોર્નરે 88 બોલમાં નવ ચોગ્ગાની મદદથી 67 રન બનાવ્યા હતા. ફિંચે 75 બોલમાં 60 રન બનાવ્યા હતા. આ સિવાય માર્નસ લબુશાને સારી બેટિંગ કરી હતી પરંતુ બાકીના કોઈ બેટ્સમેન મજબૂત શરૂઆતને મોટા સ્કોરમાં કન્વર્ટ કરી શક્યા ન હતા.લબુશાને 52 દડામાં બે ચોગ્ગાની મદદથી 56 રન બનાવ્યા હતા. લેગ સ્પિનર ઇશ સોઢીએ ન્યૂઝીલેન્ડ માટે ત્રણ વિકેટ હાંસલ કરી હતી. લોકી ફર્ગ્યુસન અને મિશેલ સેન્ટનરને બે-બે વિકેટ મળી હતી. આ જીત સાથે ઓસ્ટ્રેલિયાએ ત્રણ મેચની વનડે સિરીઝમાં 1-0થી લીડ મેળવી લીધી છે.
નોંધપાત્ર વાત એ છે કે આ મેચ ખાલી સ્ટેડિયમમાં રમાડવામાં આવી હતી. મેચ દરમિયાન કોઈ દર્શકો હાજર ન હતા. આવી સ્થિતિમાં જ્યારે પણ બેટ્સમેન મોટો શોટ ફટકારી બાઉન્ડ્રી લાઇનની બહાર બોલ મોકલતો ત્યારે ફિલ્ડરોએ જાતે જ બોલને લાવવો પડતો. આખી મેચ આ રીતે રમાઇ હતી.
આ સાથે મેચની સમાપ્તિ પછી બધા ખેલાડીઓએ હાથ ન મિલાવીને એકબીજા માટે તાળીઓ પાડીને અભિવાદન કર્યું હતું. ક્રિકેટ ઓસ્ટ્રેલિયાએ તેનો વીડિયો શેર કર્યો છે. આપને જણાવી દઈએ કે કોરોનાવાયરસ ફાટી નીકળવાના કારણે આઈપીએલ 15 એપ્રિલ સુધી મુલતવી રાખવામાં આવી છે જ્યારે ભારત-દક્ષિણ આફ્રિકાની વનડે શ્રેણી પણ રદ કરવામાં આવી છે.