ક્રિકેટ / ભારત સામેની ટેસ્ટ શ્રેણી માટે ઓસી. ટીમની જાહેરાત; આ ખેલાડી બનશે ટીમનો કેપ્ટન

શેફીલ્ડ શિલ્ડમાં સતત શાનદાર પ્રદર્શન કરનારા વિલ પુકોસ્વકીને ઓસી. ટેસ્ટ ટીમમાં સ્થાન આપવામાં આવ્યું છે. ડેવિડ વોર્નર અને સ્ટીવ સ્મિથ આ વખતે ભારત સામેની શ્રેણીમાં રમતા જોવા મળશે. માર્કસ લાબુશેન અને ટ્રેવિડ હેડને પણ ટીમમાં પસંદ કરવામાં આવ્યા છે. સ્પિન બોલિંગની જવાબદારી નાથન લિયોન અને મિચેલ સ્વેપસન સંભાળશે.

ફાસ્ટ બોલિંગમાં મિચેલ સ્ટાર્ક, જોશ હેઝલવૂડ, પેટ કમિન્સની ત્રિપુટી ઉપરાંત જેમ્સ પેટિન્સનને પણ ટીમમાં રાખવામાં આવ્યો છે. બીજા વિકેટકીપર તરીકે મેથ્યુ વેડ પણ ટીમમાં સ્થાન મેળવવામાં સફળ રહ્યો છે. યુવા ઓલરાઉન્ડર કેમરુન ગ્રીન પોતાના પ્રદર્શનથી પસંદગીકારોને પ્રભાવિત કરવામાં સફળ રહ્યો છે અને તેને ટેસ્ટ ટીમમાં સામેલ કરી લેવામાં આવ્યો છે. ગ્રીનને વન ડે ટી-૨૦ શ્રેણી માટે પણ ઓસ્ટ્રેલિયન ટીમમાં પસંદ કરવામાં આવ્યો છે. ઓસી. બોર્ડે વન ડે અને ટી-૨૦ની જાહેરાત અગાઉ જ કરી દીધી હતી.

ટેસ્ટ ટીમઃ ટિમ પેન, ડેવિડ વોર્નર, જો બર્ન્સ, સ્ટીવ સ્મિથ, કેમરુન ગ્રીન, સીન એબોટ, પેટ કમિન્સ, જોશ હેઝલવૂડ, ટ્રેવિસ હેડ, માર્નસ લાબુશેન, નાથન લિયોન, માઇકલ નેસર, જેમ્સ પેટિન્સન, મિચેલ સ્ટાર્ક, મેથ્યુ વેડ, વિલ પુકોસ્વકી અને મિચેલ સ્વેપસન.