ઓસ્ટ્રેલિયામાં કોરોનાનો બીજો વેવ શરુ થયો હોય એમ લાગે છે જેના પગલે 100 વર્ષમાં પ્રથમ વખત ઓસ્ટ્રેલિયાના બે સૌથી વધુ વસ્તી ધરાવતા રાજ્યો વિક્ટોરિયા અને ન્યુ સાઉથ વેલ્સની સરહદો બંધ કરી દેવામાં આવી છે. છેલ્લે આ વર્ષ 1919માં કરવામાં આવ્યું હતું જેથી તે વખતના સ્પેનિશ ફલૂ મહામારીને રોકી શકાય.
સત્તાધીશોના નિવેદન પ્રમાણે કોરોનાના વધતા કેસના પગલે વિક્ટોરિયા રાજ્યને હાલ પૂરતું દેશથી વિખૂટું પાડી દેવાયું છે. નોંધનીય છે કે ઓસ્ટ્રેલિયામાં એક સાથે 127 કોરોનાના નવા સંક્રમણ બહાર આવ્યા બાદ સરકારે આ નિર્ણય લીધો હતો. આ આંકડો મહામારી શરુ થઇ ત્યાર પછીનો સૌથી ઊંચો આંકડો છે. આ ઉપરાંત વિક્ટોરિયામાં એક મોત નોંધાઈ થાય છે. દેશમાં બે અઠવાડિયા બાદ પહેલી વખત આ મોત નોંધાઈ છે જેથી કુલ મૃત્યુઆંક 105 ઉપર પહોંચ્યો છે.
વિક્ટોરિયન પ્રીમિયર ડેનિયલ એન્ડ્રયુએ આ નિર્ણયને સમજદારીભર્યો અને સમયસરનો નિર્ણય કહ્યો હતો કારણ કે દેશ વાયરસ સામે લડત આપી રહ્યો છે. ઓસ્ટ્રેલિયામાં કોરોનાના રિસ્ટ્રિક્શન ઓછા થતા મેલબોર્નમાં કોમ્યુનિટી ટ્રાન્સમિશનમાં વધારો થયો છે. આ કારણોસર મેલબોર્નના કેટલાક વિસ્તારોમાં સત્તાધીશોએ લોકડાઉન જાહેર કરી લીધું છે.
ઓસ્ટ્રેલિયાના આ લોકડાઉનથી 3000 નાગરિકો પ્રભાવિત છે. મેલબોર્નના એક હાઉસિંગ ટાવર્સમાં એક સાથે 16 કોરોનાના નવા કેસ સામે આવ્યા છે. અત્યાર સુધી ઓસ્ટ્રેલિયામાં 8500 કોરોનાના કેસ આવ્યા છે અને 105 લોકોના મોત થયા છે અને મોટાભાગના કેસ મેલબોર્નમાં ડિટેકટ થયા છે. જો કે દેશના બીજા ભાગોમાં સફળતાપૂર્વક કેસીસ નિયંત્રણમાં આવી જતા લોકડાઉનને હળવું કરવામાં આવ્યું છે.