કોરોના વાઇરસના કારણે ટોકિયો ઓલિમ્પિક પર સંકટનાં વાદળ મંડરાવા માંડ્યાં છે. કોઈ પણ સંજોગોમાં ટોકિયો ઓલિમ્પિકનું આયોજન કરવાની કોશિશને એ સમયે મોટો ઝટકો લાગ્યો, જ્યારે ઓસ્ટ્રેલિયા અને કેનેડાએ પોતાના ખેલાડીઓને ટોકિયો ઓલિમ્પિકમાં મોકલવાનો ઇનકાર કરી દીધો. આ બંને દેશે પોતાના ખેલાડીઓને કહ્યું છે કે તેઓ પોતાની તૈયારીઓ ચાલુ રાખે, પરંતુ આ વર્ષે ટોકિયો ઓલિમ્પિક યોજાય તેવી શક્યતા નથી. કોરોના વાઇરસ દુનિયાભરમાં વધુ ને વધુ ફેલાઈ રહ્યો છે ત્યારે જો ઓલિમ્પિકનું આયોજન થાય તો આ મહામારી વધુ ઝડપથી ફેલાઈ શકે છે.
કોરોના વાઇરસના કારણે ટોકિયો ઓલિમ્પિક પર સંકટનાં વાદળ મંડરાયા
ઓસ્ટ્રેલિયા અને કેનેડાએ પોતાના ખેલાડીઓને મોકલવાનો ઈનકાર
ચાર સપ્તાહમાં ઓલિમ્પિક અંગે નિર્ણય લેવાશે
કેનેડિયન ઓલિમ્પિક સમિતિ અને કેનેડિયન પેરાલિમ્પિક સમિતિનું કહેવું છે કે તેઓ પોતાના ખેલાડીઓને ટોકિયો ઓલિમ્પિકમાં નહીં મોકલે. કોરોનાની મહામારીના કારણે ખેલાડીઓની સુરક્ષા અને સામાન્ય જનતાને ટાંકીને આ બંને સમિતિ આંતરરાષ્ટ્રીય ઓલિમ્પિક સમિતિને એક વર્ષ માટે ઓલિમ્પિક સ્થગિત કરવાનું આહવાન કરી ચૂકી છે. સમિતિનું કહેવું છે કે કોરોના વાઇરસના જોખમને જોતાં આ ના તો અમારા ખેલાડીઓ માટે સુરક્ષિત છે કે ના તો તેમના પરિવાર માટે.
ઉલ્લેખનીય છે કે આગામી ઓલિમ્પિક રમતોત્સવ 24 જુલાઈથી શરૂ થઇ 9 ઓગસ્ટે પૂરો થવાનો છે. કોરોનાના કારણે ચીનમાં બોક્સિંગ અને બેડમિન્ટનની ઓલિમ્પિક ક્વોલિફાયર સ્પર્ધાઓ અગાઉથી જ રદ કરી દેવામાં આવી છે.
કોરોનાના કેર છતાં ઉત્તર-પૂર્વ જાપાનમાં ઓલિમ્પિક મશાલને જોવા માટે હજારોની સંખ્યામાં દર્શકો પહોંચ્યા હતા. સેન્ડાઇના મિયામી સ્ટેડિયમમાં ઓલિમ્પિક મશાલને પ્રદર્શિત કરવામાં આવી હતી અને 50 હજારથી પણ વધુ લોકો ઓલિમ્પિક મશાલને જોવા માટે પહોંચી ગયા હતા. સ્થાનિક મીડિયાના જણાવ્યા અનુસાર કેટલાક લોકો 500 મીટર લાંબી કતારમાં કલાકો સુધી ઊભા રહ્યા હતા અને એમાંના મોટા ભાગના લોકોએ માસ્ક પહેર્યાં હતાં.
ચાર સપ્તાહમાં ઓલિમ્પિક અંગે નિર્ણય લેવાશેઃ થોમસ બાક
આંતરરાષ્ટ્રીય ઓલિમ્પિક સમિતિ (આઇઓસી)ના અધ્યક્ષ થોમસ બાકે જણાવ્યું છે કે 2020ના ટોકિયો ઓલિમ્પિકને રદ કરવામાં નહીં આવે, પરંતુ વિશ્વભરમાં કોરોના વાઇરસની મહામારીના કારણે થોડા સમય માટે સ્થગિત જરૂર કરાઈ શકે છે.
બાકે પોતાના નિવેદનમાં જણાવ્યું છે, ''ICOના કાર્યકારી બોર્ડે ભાર દઈ કહ્યું છે કે ઓલિમ્પિકને રદ કરવી એ કોઈ સમસ્યાનું સમાધાન નહીં હોય. આથી ઓલિમ્પિકને રદ કરવાનો કોઈનો પણ વિચાર નથી. ઓલિમ્પિક જેવા આયોજનને રદ ના કરી શકાય, પરંતુ સ્થગિત જરૂર કરી શકાય, જેના મટે અમે ચાર સપ્તાહ (એટલે કે એક મહિનો)ની રાહ જોવા ઇચ્છીએ છીએ.''