ઓસ્ટ્રેલિયામાં જંગલોમાં ભારે આગજની બાદ ન્યુ સાઉથ વેલ્સમાં ધૂળની ડમરીઓએ લોકો માટે એક નવી મુશ્કેલી ઉભી કરી છે. ધૂળના તોફાનનો વીડિયો સામે આવ્યો છે જે ખૂબ ચિંતાજનક અને બિહામણો છે.
ધૂળની આંધી નેરોમાઈન શહેરને ખરાબ રીતે પ્રભાવિત કરી રહી છે. આ કારણે અનેક શહેરો અને નગરોમાં કલાકો સુધી વીજળીનો સપ્લાય રોકાઈ ગયો છે. ઓસ્ટ્રેલિયાના હવામાન ખાતા અનુસાર ધૂળનું તોફાન માધ્ય પૂર્વમાં વધુ તીવ્ર છે.
નોંધનીય છે કે ત્યાંના હવામાન ખાતાએ રવિવારે જ દેશના વિસ્તારોમાં ગંભીર ધૂળના વાદળો સાથે તીવ્ર આંધીની ચેતવણી જાહેર કરી હતી જેથી લોકો પહેલેથી સુરક્ષિત સ્થળોએ ખસી શકે.
હવામાન ખાતા પ્રમાણે પાર્ક્સ ક્ષેત્રમાં ધૂળની આંધીની ઝડપ 94 કિમી પ્રતિ કલાક હતી જયારે ડબબોમાં 7:45એ ધૂળના તોફાનની ઝડપ 107 કિમી પ્રતિ કલાક નોંધવામાં આવી હતી.
આ ધૂળના તોફાનના પગલે રાજ્યની ઇમર્જન્સી સેવાને રવિવારે સવારે 1453થી વધુ કોલ આવ્યા હતા જેમાંથી 1000 કોલ તો ફક્ત ઇમારતો અને ઘરને પહોંચેલા નુકશાનની મદદ માટે આવ્યા હતા.