ઓસ્ટ્રેલિયાએ દુબઈમાં રમાયેલી પાંચમી અને અંતિમ વન ડેમાં પાકિસ્તાનને 20 રનથી હરાવી દીધું અને આ સીરિઝની જાતે જ પાકિસ્તાનના સૂપડા સાફ થઇ ગયા.
આ જીત સાથે જ ઓસ્ટ્રેલિયાએ 5-0થી પાકિસ્તાનનાં સૂપડાં સાફ કરી નાખ્યાં. સીરિઝની બધી મેચ ઓસ્ટ્રેલિયાની ટીમે જીતી લીધી અને તેઓએ આ સતત 8મી વન ડે સીરિઝ જીતી લીધી છે.
ગ્લેન મેક્સવેલને તેના ઓલરાઉન્ડ પ્રદર્શન (70 રન અને 1 વિકેટ) બદલ મેન ઓફ ધ મેચ અને કેપ્ટન એરોન ફિંચને સીરિઝમાં 451 રન ફટકારવા બદલ મેન ઓફ ધ સીરિઝનું ટાઇટલ આપવામાં આવ્યુ છે. ઓસ્ટ્રેલિયાએ પ્રથમ બેટિંગ કરતાં 7 વિકેટે 327 રન બનાવ્યા હતા, જેના જવાબમાં પાકિસ્તાન નિર્ધારિત 50 ઓવરમાં 7 વિકેટે 307 રન જ બનાવી શકતાં તેઓનો 20 રને પરાજય થયો હતો. પાક. તરફથી હેરિસ સોહેલે સેન્ચુરી ફટકારતાં 130 રનની ઇનિંગ્સ રમી હતી.
અગાઉ પાકિસ્તાનના કેપ્ટન ઇમાદ વસીમે ટોસ જીતીને બોલિંગ કરવાનો નિર્ણય કર્યો હતો, પરંતુ તેનો આ નિર્ણય બૂમરેંગ સાબિત થયો હતો. ઉસ્માન ખ્વાજા અને એરોન ફિંચની જોડીએ પ્રથમ વિકેટ માટે 134 રનની ભાગીદારી નોંધાવી, જોકે ખ્વાજા પોતાની સદી પૂરી કરી શક્યો નહીં અને 98 રન બનાવીને આઉટ થઈ ગયો. ફિંચે 53 રનની ઇનિંગ્સ રમી. શોન માર્શે 61 રન અને ગ્લેન મેક્સવેલે ફક્ત 33 બોલમાં 10 બાઉન્ડ્રી અને 3 સિક્સરની સાથે 70 રનની તોફાની ઇનિંગ્સ રમીને ઓસ્ટ્રેલિયાના સ્કોરને 327 રન સુધી પહોંચાડવામાં મહત્ત્વપૂર્ણ ભૂમિકા ભજવી હતી.
328 રનના લક્ષ્યનો પીછો કરવા ઊતરેલા પાકિસ્તાનની શરૂઆત ખરાબ રહી હતી. આબિદ આલી પ્રથમ બોલે જ આઉટ થઈ ગયો હતો, જોકે ત્યાર બાદ બીજી વિકેટ માટે શાન મસૂદ અને હેરિસ સોહેલ વચ્ચે 108 રનની પાર્ટનરશિપ કરી. એક સમયે પાકિસ્તાનની ટીમ 3 વિકેટે 237 રન બનાવીને મજબૂત સ્થિતિમાં હતી, પરંતુ ફક્ત એક રનના ઉમેરામાં બે વિકેટ ગુમાવી દીધી હતી. સૌથી પહેલાં ઉમર અકલ 238 રનના સ્કોર પર 43 રન બનાવીને આઉટ થઈ ગયો. ત્યાર બાદ શાનદાર સેન્ચુરી ફટકારનારો હેરિસ સોહેલ પણ 130 રન બનાવીને પેવેલિયનમાં પાછો ફર્યો હતો.