ભવિષ્ય સુધરશે / બાળકો નહીં વાપરી શકે સોશિયલ મીડિયા, મૂકાયો પ્રતિબંધ, બધે લાગુ પાડવાની જરુર

સોશિયલ મીડિયા બાળકોનું ભવિષ્ય બરબાદ કરી રહ્યું છે, આ વાત દરેક જગ્યાએ સાંભળવા મળી રહી છે. સોશિયલ મીડિયાના કારણે ઘણા લોકો બરબાદ થઈ ગયા છે, ઘણા લોકો માનસિક રીતે નબળા થઈ ગયા છે. બાળકો પર તેની નકારાત્મક અસરને કારણે સોશિયલ મીડિયા હવે ચિંતાનો વિષય બની ગયો છે. તેથી હવે ઓસ્ટ્રેલિયામાં 16 વર્ષથી ઓછી ઉંમરના બાળકો માટે સોશિયલ મીડિયાના ઉપયોગ પર પ્રતિબંધ મૂકવામાં આવ્યો છે. સરકારના આ નિર્ણય બાદ હવે 16 વર્ષથી ઓછી ઉંમરના બાળકો ફેસબુક, ઇન્સ્ટાગ્રામ, ટિકટોક, યુટ્યુબ સહિતના ઘણા સોશિયલ મીડિયા નહીં વાપરી શકે.

સોશિયલ મીડિયા પ્રતિબંધ માટે નવો કાયદો

ઓસ્ટ્રેલિયાના વડાપ્રધાન એન્થોની અલ્બેનિસે આ અંગે જણાવ્યું કે છેલ્લા કેટલાક સમયથી હું બાળકો પર સોશિયલ મીડિયાની અસર વિશે જણાવવાનો પ્રયાસ કરી રહ્યો છું. આ સોશિયલ મીડિયા બાળકો માટે ખતરનાક છે. આ તેમની વૃદ્ધિને અટકાવે છે. સમસ્યાઓમાં ફસાયેલા બાળકોની સંખ્યા વધી રહી છે. બાળકો છેતરપિંડી સહિતની અનેક મુશ્કેલીઓમાં ફસાઈ રહ્યા છે. તેથી 16 વર્ષથી ઓછી ઉંમરના બાળકોને સોશિયલ મીડિયાથી દૂર રાખવા માટે નવો કાયદો લાવવામાં આવી રહ્યો છે. કાયદાનો ડ્રાફ્ટ તૈયાર કરવામાં આવ્યો છે. અંતિમ તૈયારી બાદ તેને સંસદમાં રજૂ કરવામાં આવશે. એકવાર કાયદો લાગુ થયા પછી તે 12 મહિનાની અંદર અમલમાં આવશે. આ કાયદા હેઠળ 16 વર્ષથી ઓછી ઉંમરના બાળકોને સોશિયલ મીડિયાથી દૂર રાખવામાં આવશે. આ અંગે વાલીઓએ સાવધાન રહેવું પડશે. માતાપિતાની પરવાનગી વિના બાળકો સોશિયલ મીડિયાનો ઉપયોગ નહીં કરી શકે.

કયા કયા દેશોએ સોશિયલ મીડિયાના ઉપયોગ પર મૂક્યો પ્રતિબંધ

ઓસ્ટ્રેલિયા પહેલા ફ્રાન્સે પણ 15 વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકવાનો પ્રસ્તાવ મૂક્યો હતો. અમેરિકા પણ આવા જ નિયમો લાગુ કરવાની તૈયારી કરી રહ્યું છે. ભારતમાં પણ આને લઈને ઘણી ચર્ચાઓ થઈ રહી છે. સોશિયલ મીડિયાના વધુ પડતા ઉપયોગને કારણે, ફક્ત બાળકો જ નહીં પરંતુ પુખ્ત વયના લોકો પણ ખોટા માર્ગ પર જઈ રહ્યા છે. અનેક અકસ્માતો અને બનાવો બન્યા છે. તાજેતરમાં રીલનો પ્રભાવ વધી રહ્યો છે. રીલ બનાવવાની પ્રક્રિયામાં ઘણા લોકોએ પોતાનો જીવ ગુમાવ્યો છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ