ભારત સામે આગામી મહિને રમાનારી ત્રણ વન ડે સીરિઝ માટે ઓસ્ટ્રેલિયાએ પોતાની ટીમની જાહેરાત કરી દીધી છે. ઓસ્ટ્રેલિયા ટીમે ઈંગ્લેન્ડ વર્લ્ડકપમાં રમેલા 7 ખેલાડીઓને ટીમમાંથી ડ્રોપ કર્યા છે. આ ખેલાડીઓમાં ગ્લેન મેક્સવેલ, નાથન લાયન અને માર્કસ સ્ટોઈનિસ જેવા ખેલાડીઓ સામેલ છે. ઓસ્ટ્રેલિયા સિલેક્ટર્સે ટેસ્ટ ફોર્મેટમાં શાનદાર પ્રદર્શન કરનાર માર્નસ લાબુશેનને 14 ખેલાડીઓની ટીમનો ભાગ બનાવ્યો છે. જ્યારે, જોશ હેઝલવુડની વનડે ટીમમાં વાપસી થઈ છે. એવા પણ સમાચાર છે કે કોચ જસ્ટિન લેન્ગર આરામ પર હોવાથી વન ડે સીરિઝ માટે ઓસ્ટ્રેલિયા ટીમે એન્ડ્રયૂ મેક્ડોનાલ્ડને હેડ કોચ બનાવ્યા છે.
ઓસ્ટ્રેલિયા વર્લ્ડ કપ પછી પહેલીવાર વનડે સીરિઝ રમશે
ભારત અને ઓસ્ટ્રેલિયા 14, 17 અને 19 જાન્યુઆરીએ વનડે રમશે
વર્લ્ડકપમાં રમેલા આ 7 ખેલાડીઓ આ વખતે ઓસ્ટ્રેલિયા ટીમમાંથી બહાર
ઓસ્ટ્રેલિયા ટીમની જાહેરાત
ઓસ્ટ્રેલિયા ટીમની કમાન એરોન ફિંચ સંભાળશે, જ્યારે એલેક્સ કેરી અને પેટ કમિંસ વાઈસ કેપ્ટન હશે. ટીમમાં 5 ફાસ્ટ બોલરને સામેલ કરાયા છે. તો બીજી બાજુ એડમ જંપા અને એશ્ટન એગરને બે સ્પિનર્સ તરીકે ટીમમાં સામેલ કર્યા છે. માર્નસ લાબુશેન વન ડે ટીમમાં સ્થાન મળશે. લાબુશેન ટેસ્ટ ફોર્મેટમાં જબરદસ્ત ફોર્મમાં છે. જોકે, આ બેટ્સમેન વનડે ફોર્મેટમાં પણ પોતાને સાબિત કરી ચૂક્યો છે. લાબુશેને હાલમાં જ માર્શ વન ડે કપમાં 60થી વધુ સરેરાશ રન બનાવ્યા હતા. લાબુશેનના સિલેક્શન પર ઓસ્ટ્રેલિયાના ચીફ સિલેક્ટર ટ્રેવર હોન્સે કહ્યું, 'પાકિસ્તાન સામે રમાયેલી ટી 20 સીરિઝમાં અમારા ટોપ ઓર્ડરે શાનદાર પ્રદર્શન કર્યું હતું, જેથી તેને ટીમમાં રાખવામાં આવ્યો છે. જોકે, અમને લાગે છે કે માર્નસ લાબુશેન હવે વન ડેમાં ડેબ્યૂ માટે તૈયાર છે. તેણે ક્વીસલેન્ડમાં આ ફોર્મેટમાં ઘણાં રન બનાવ્યા છે.'
વર્લ્ડકપમાં રમેલા આ 7 ખેલાડીઓ બહાર
હાલમાં જ ઈંગ્લેન્ડમાં રમાયેલા વર્લ્ડ કપમાં ટીમનો ભાગ રહેલાં ઉસ્માન ખ્વાજા, શૉન માર્શ, નાથન કુલ્ટર નાઈલ, ગ્લેન મેક્સવેલ, નાથન લાયન અને માર્કસ સ્ટોયનિસને ટીમમાંથી બહાર રાખવામાં આવ્યા છે. જ્યારે, જેસન બેહરનડોર્ફ ઈજાના કારણે ટીમનો ભાગ બની શક્યા નહીં.