અમરેલી / કોંગ્રેસના પૂર્વ MLA દૂધાતનો AUDIO વાયરલ: અંધશ્રદ્ધા સામે આંખમાં આંખ નાખીને વાત કરીશ, કપાસના ભાવ મુદ્દે પૂછ્યો સવાલ

• ધીરેન્દ્ર શાસ્ત્રીના સમર્થકે પ્રતાપ દૂધાતને કર્યો કોલ
• બંન્ને વચ્ચે થયેલી વાતચીતની ઓડિયો ક્લિપ વાયરલ 
• ખેડૂતોને યોગ્ય ભાવ મળશે તો હું બાબાને વંદન કરીશઃ દૂધાત 

બાગેશ્વર ધામના પીઠાધિશ્વર ધીરેન્દ્ર શાસ્ત્રી ગુજરાતમાં આવી રહ્યા છે, ત્યારે અહી સતત આ મુદ્દો ચમકી રહ્યો છે. ધીરેન્દ્ર શાસ્ત્રીના અમદાવાદ, સુરત, રાજકોટ અને વડોદરામાં દિવ્ય દરબાર ભરાવા જઈ રહ્યા છે. ધીરેન્દ્ર શાસ્ત્રીના કાર્યક્રમને લઈને ભારે ચર્ચાઓ વચ્ચે વિવાદનો મધપૂડો પણ છેડાયો છે. એક તરફ ધીરેન્દ્ર શાસ્ત્રીનું સમર્થન થઈ રહ્યું છે તો બીજી તરફ ધીરેન્દ્ર શાસ્ત્રીનો વિરોધ થઈ રહ્યો છે. ત્યારે કોંગ્રેસના પૂર્વ ધારાસભ્યએ ધીરેન્દ્ર શાસ્ત્રીને પત્ર લખ્યો છે. જેમાં તેઓએ લખ્યું છે કે ધીરેન્દ્ર શાસ્ત્રી કપાસના ભાવ 2400 ક્યારે થશે એટલું દિવ્ય શક્તિથી કહે. 

ઓડિયો ક્લિપ પણ થઈ વાયરલ
આ ઉપરાંત હાલ સોશિયલ મીડિયા પર કોંગ્રેસના પૂર્વ ધારાસભ્ય પ્રતાપ દૂધાત અને ધીરેન્દ્ર શાસ્ત્રીના સમર્થક અમિત નામના વ્યક્તિની એક ઓડિયો ક્લિપ પણ ઝડપથી વાયરલ થઈ રહી છે. ધીરેન્દ્ર શાસ્ત્રીને લખેલા પત્ર બાદ ધીરેન્દ્ર શાસ્ત્રીના સમર્થક અમિત નામના વ્યક્તિએ પ્રતાપ દૂધાતને કોલ કર્યો હતો. બંન્ને વચ્ચે થયેલી વાતચીતની ઓડિયો ક્લિપ થઇ વાયરલ છે. જેમાં બાગેશ્વર ધામના અનુયાયી અમિતભાઈ પ્રતાપ દુધાતને કહી રહ્યા છે કે, તમારે લોક દરબારમાં આવીને પ્રશ્ન કરવો જોઈએ. 

મેં કોઈ ધર્મનો વિરોધી નથી કર્યોઃ પ્રતાપ દૂધાત
તેઓ કહી રહ્યા છે કે, તમે પાદરી અને મૌલવીઓનો વિરોધ કેમ નથી કરતા? જ્યારે તેમના જવાબમાં પ્રતાપ દૂધાત કહે છે કે, મેં કોઈ ધર્મનો વિરોધી નથી કર્યો, મેં માત્ર ખેડૂતને યોગ્ય ભાવ મળે તે માટે પત્ર લખ્યો છે અન્ય કોઈ જ સવાલ કર્યો નથી. આ વાતચીતમાં અમિતભાઈ કહી રહ્યા છે કે, તમારે બાબાના દરબારમાં પ્રશ્ન પૂછવો જોઈએ, જેથી તમને યોગ્ય જવાબ મળી શકશે. આ પછી દૂધાત જણાવે છે કે, ખેડૂતોને યોગ્ય ભાવ મળે તો હું બાબાને વંદન કરીશ. એટલું જ નહીં મોટી સંખ્યામાં ખેડૂત સાથે બાબાને વંદન કરીશ. ધીરેન્દ્ર શાસ્ત્રી કપાસના ભાવ 2400 ક્યારે થશે એટલું દિવ્ય શક્તિથી જણાવશે તો હું બાબાના ચરણોમાં વંદન કરીશ. તેઓએ કહ્યું કે, કોઈ પણ અંધશ્રદ્ધા ફેલાવાવતું હોય તો આંખમાં આંખ નાખીને વાત કરીશ. કોઈ પાદરી કે મૌલવીઓ અંધશ્રદ્ધા ફેલાવે તો જણાવજો.

પ્રતાપ દૂધાતે પત્ર લખીને કરી છે આ માંગ 
આપને જણાવી દઈએ કે, સાવરકુંડલાના પૂર્વ ધારાસભ્ય પ્રતાપ દૂધાતે ધીરેન્દ્ર શાસ્ત્રીને પત્ર લખ્યો છે. જેમાં તેઓએ લખ્યું છે કે, આપની દિવ્યશક્તિથી જણાવો કે ગુજરાતના ખેડૂતોને કપાસના ભાવ રૂ.1500માંથી 2400 આ સરકાર ક્યારે આપશે? આપ દ્વારા પરચીઓ ખોલીને આ ગુજરાતની જનતાને જણાવો.