વડોદરા / મનપાનો કેવો વહીવટ ? હાજરી પૂરવા ફેસ રિકોગ્નિશન મશીન અને પગાર માટે મેન્યુઅલ હાજરીપત્રક !

• વડોદરા મનપાનો અંધેર વહીવટ
• હાજરી પૂરવા ફેસ રિકોગ્નિશન મશીન
• પગાર કરવા મેન્યુઅલ હાજરીપત્રક

પરંતુ કેટલીક સરકારી કચેરીઓમાં કરડોના ખર્ચે ઊભી કરેલી આવી વ્યવસ્થા માત્ર શોભાના ગાંઠિયા સમાન હોય તેવું લાગી રહ્યું છે. આ  દાખલો જોવા માટે દૂર જવાની જરૂર નથી. વડોદરામાં હાજરી પૂરવાના ફેસ રિકોગ્નિશન મશીનના ડેટાને કોઈ તબક્કો ધ્યાનમાં લેવામા આવતો નથી. 

હાજરી પૂરવા ફેસ રિકોગ્નિશન મશીન

સ્માર્ટ સિટી વડોદરામાં પાલિકાએ કર્મચારીઓ અને અધિકારીઓની હાજરીની નિયમિતતા પર નજર રાખવા માટે લાખોના ખર્ચે ફેસ રિકોગ્નિશન મશીન મૂક્યા છે. પાલિકાની મુખ્ય કચેરી સહિત તમામ કચેરીમાં કુલ 112 જેટલા ફેસ રિકોગ્નિશન મશીનો મૂકવામાં આવ્યા છે. હા કર્મચારીઓ આ મશીન પાસે ઊભા રહીને  પોતાની હાજરી પણ નોંધાવે છે. બસ આટલી  પ્રક્રિયામાં આ મશીનની ભૂમિકા પૂરી થઈ જાય છે. 

કેમ કે, આ મશીન વસાવવા પાછળનો જે ઉદેશ્ય છે તે ઉદેશ્યને જ વડોદરા મનપાના  ઉચ્ચ અધિકારીઓ ભૂલી ગયા છે. કેમ કે કર્મચારીઓએ મશીન દ્વારા નોંધાવેલી હાજરી ડિજિટલ સ્વરૂપે ઉપલબ્ધ હોવા છતાં કર્મચારીઓના પગાર કરતી વખતે કે અન્ય વહીવટી  પ્રક્રિયામાં તેને ધ્યાનમાં લેવામા આવતી નથી. 

મહાનગરપાલિકામાં  ફેસ રિકોગ્નિશન મશીનની અગત્યતાને નજર અંદાજ કરવાની  વાત  સામાજિક કાર્યકર અને ધર્મગુરુ જ્યોતિર્નાથ મહારાજના ધ્યાન પર આવી  તો તેમણે આ બાબતે વડોદરાના મેયર જિગીષાબેન શેઠ અને ડેપ્યુટી કમિશનર સુધીર કે  પટેલનું ધ્યાન દોર્યુ. એક સામાજિક કાર્યકરની હેસિયતથી તેમણે ટેકનોલોજીની અવગણનાને જનતાના નાણાનો દુરુપયોગ ગણાવી છે. સાથે તેમણે મહાનગર પાલિકાના અધિકારીઓને એ વિચારવા મજબૂર પણ કર્યા છે કે, કે જો હજુ પણ વહીવટી પ્રક્રિયા માટે મેન્યુઅલ હાજરી પર જ મદાર રાખવાનો હોય તો આવા મશીન મૂકીને દેખાડો કરવાની શું જરૂર છે.  

થઈ રહી છે ટેકનોલોજીની અવગણના

આખો  મામલો વધારે તૂલ પકડે તે  પહેલા વડોદરા મહાનગર પાલિકાના ડેપ્યુટી કમિશનર અને મેયરે હાજરી માટે મશીનના ફરજિયાત ઉપયોગનો અને પગાર માટે એ મશીનથી ઉપલબ્ધ ડેટા પર જ આધાર રાખવા માટે પગલાં લેવાની ખાતરી આપી છે.  

એક તરફ સરકારી ઓફિસોને પેપરલેસ કરવાની  અને વહીવટી પારદર્શિતાની વાતો ચાલી રહી છે ત્યારે આવી અનેક ઓફિસોમાં કર્મચારીઓની હાજરી પૂરવા માટે મેન્યુઅલ રજિસ્ટરનો સહારો લેવાઈ રહ્યો છે અને એ પણ ટેકનોલોજીની સુવિધા ઉપલબ્ધ હોવા છતાં. ત્યારે આ બાબત ચિંતાનો વિષય છે.