વડોદરાના ડભોઈમાં ધારાસભ્યની પુત્રીની કાર પર હુમલાની ઘટના બનતા વિવાદ સર્જાયો છે. પોલીસે હુમલો કરનાર દંપતીની ધરપકડ કરી તો ધારાસભ્યએ પોલીસની કામગીરી પર સવાલો ઉઠાવ્યા હતા.
વાહન અથડાવાના મુદ્દે 7 શખ્સોએ કર્યો હુમલો
રાવપુરા પોલીસે હુમલા કરનાર દંપતીની કરી ધરપકડ
દાંડીયાબજાર અવાર નવાર યુવતીઓની છેડતી થાય છેઃ મહેતા
ડભોઈના ભાજપના ધારાસભ્ય શૈલેષ મહેતાની પુત્રી પર હુમલાની ઘટના સામે આવી છે. મળતી માહિતી પ્રમાણે, શૈલેષ મહેતાની પુત્રી રતી મહેતા જ્યારે દાંડિયા બજાર ચાર રસ્તા પાસેથી પસાર થઈ રહી હતી. તે દરમિયાન અન્ય વાહન સાથે તેની કાર અથડાઈ હતી. જેને લઈને તકરાર થયા બાદ મામલો વધુ ગરમાતા 7 જેટલા શખ્સોએ તેના પર હુમલો કર્યો હતો. તેની કારના કાચ તોડી નાખ્યા હતા.
જોકે ઘટના અંગે જાણ થતા જ રાવપુરા પોલીસ સ્થળ પર દોડી આવી હતી. આ સમગ્ર મામલો સામે આવ્યા બાદ ધારાસભ્ય શૈલેષ મહેતાનું મહત્વપૂર્ણ નિવેદન સામે આવ્યું છે.
વીટીવી સાથે વાત કરતા તેમણે કહ્યું કે, દાંડીયા બજારમાં અવાર-નવાર યુવતીઓની છેડતી થાય છે. પોલીસ નિષ્ક્રિય હોવાથી આ પ્રકારની ઘટનાઓ ઘટી રહી છે. પરંતુ સવાલ એ થાય છે કે, હુમલાના આરોપમાં ધરપકડ એક દંપત્તિની કરવામાં આવી છે. તો શું દંપત્તિ તેની પુત્રીની છેડતી કરતા હતા. અહીં એવું તો નથીને કે, ધારાસભ્ય પોતાની પુત્રીની ભૂલને છુપાવવા માટે આ પ્રકારના નિવેદન આપી રહ્યા છે.