એકતરફ ગુજરાતમાં રખડતા ઢોરને પકડવા હાઇકોર્ટનો કડક આદેશ છે ત્યારે બીજી બાજુ રખડતા પશુને પકડવા માટેની કાર્યવાહી હાથ ધરી રહેલ પાલિકાની ટીમ પર હુમલો કરવામાં આવી રહ્યો છે. જે ખરેખર એક શરમજનક ઘટના કહી શકાય.
રખડતા પશુ પકડવા ગયેલી ટીમ પર બે શખ્સોએ કર્યો પથ્થરમારો
કોર્ટના આદેશ બાદ હાલ સમગ્ર રાજ્યભરમાં જનતાને રખઢતા ઢોરના ત્રાસથી બચાવવા મહેસાણામાં રખડતા પશુ પકડવા ગયેલી પાલિકાની ટીમ પર હુમલો કરવામાં આવ્યો છે. શહેરના લાખવડ રોડ પર ઋષિનગર પાસે આ ચોંકાવનારી ઘટના ઘટી છે. ટીમ જ્યારે ઢોર પકડી રહી હતી ત્યારે તેઓની પર બે શખ્સોએ પથ્થરમારો કર્યો હતો. ઢોર પાર્ટીએ પકડેલા પશુ છોડાવી શખ્સો ફરાર થઇ ગયા. જોકે, આ ઘટનામાં પાલિકાના ડ્રાઇવરને ઇજા થતા તેને હોસ્પિટલ ખસેડાયો હતો. હાલ આ સમગ્ર ઘટનાને લઇને બે શખ્સો વિરૂદ્ધ ફરિયાદ પણ નોંધવામાં આવી.
સાબરકાંઠામાં ફરી રખડતા ઢોરનો ત્રાસ વકર્યો
મહત્વનું છે કે, ગુજરાતમાં રખડતા ઢોરનો ત્રાસ એટલી હદે વધી ગયો છે કે, રોજબરોજ એકાદ બે ઘટના તો ચોક્કસથી સામે આવે જ છે. હજુ આજની જ વાત કરીએ તો સાબરકાંઠામાં ફરી રખડતા ઢોરનો ત્રાસ વકર્યો છે. આજે જ હિંમતનગરના મહાવીરનગર નજીક એક પરિવારને રોડ પર 2 પશુઓએ અડફેટમાં લીધા છે. મહાવીરનગરની હડિયોલ સોસાયટી પાસેના રોડ પર પશુઓનો ખૂબ ત્રાસ જોવા મળી રહ્યો છે. આ સમગ્ર ઘટનાના CCTV ફૂટેજ પણ સામે આવ્યા છે.
તાજેતરમાં રખડતાં ઢોર મામલે હાઈકોર્ટે સરકાર પાસે જવાબ માંગ્યો હતો
ઉલ્લેખનીય છે કે, તાજેતરમાં રખડતાં ઢોર મામલે જોવા મળી રહેલી મંદ કાર્યવાહીને પગલે ગુજરાત હાઈકોર્ટે સરકાર પાસે જવાબ માંગ્યો હતો. રખડતા ઢોર મામલે હાઇકોર્ટમાં થોડાક દિવસો અગાઉ થયેલી સુનાવણી દરમિયાન હાઇકોર્ટે ઢીલી કામગીરીને લઇ સરકારનો ઉધડો લીધો હતો. જમીની સ્તર પર કામગીરી ન થતા હાઇકોર્ટે સરકાર અને તંત્રને કામ ફક્ત કાગળ પૂરતું સીમિત ન રહે તે માટેની પણ ટકોર કરી હતી. ત્યારે હાઇકોર્ટ સમક્ષ સરકારે જવાબ રજૂ કરતાં કહ્યું હતું કે, '100 નંબર પર રખડતા ઢોર મામલે ફરિયાદ કરી શકાશે. રખડતા ઢોર માટે CCTV લગાવવામાં આવશે. તો બીજી તરફ હાઈકોર્ટે પણ યોગ્ય કામગીરી ન થઇ તો કલેક્ટર જવાબદાર ઠેરવાશે તેવો નિર્દેશ પણ કર્યો છે.'
રખડતાં ઢોરને લીધે એક વર્ષમાં 4,860 અકસ્માતના બનાવો બન્યા
અમદાવાદ
524
કચ્છ
156
અમરેલી
259
ખેડા
96
આણદ
93
મહેસાણા
128
અરાવલ્લી
117
મહીસાગર
132
બનાસકાંઠા
209
મોરબી
65
ભરૂચ
94
નર્મદા
90
ભાવનગર
218
નવસારી
86
બોટાદ
66
પંચમહાલ
193
છોટાઉદેપુર
139
પાટણ
90
દાહોદ
282
પોરબંદર
87
દેવભૂમિ દ્વારકા
70
રાજકોટ
175
ગાંધીનગર
114
સાબરકાંઠા
145
ગીર સોમનાથ
80
સુરત
248
જામનગર
130
સુરેન્દ્રનગર
134
જૂનાગઢ
204
તાપી
80
વડોદરા
164
ડાંગ
97
વલસાડ
95
------------
-----------
રાજ્યમાં રખડતા ઢોરથી છેલ્લા એક વર્ષમાં અધધ 4,860 અકસ્માતના બનાવો બન્યા છે. જેમાં કેટલાય લોકો ગંભીર રીતે ઇજાગ્રસ્ત થયા હતા તો કેટલાય લોકો મોતને ભેટયા હતા. ત્યારે VTV ન્યૂઝ પાસે રખડતા ઢોરના ત્રાસની એક્સક્લુઝિવ માહિતી છે. ઓગસ્ટ 2021માં 314 અકસ્માત રખડતાં ઢોરને કારણે થયા હતા. જ્યારે સપ્ટેમ્બર 2021માં 372, ઓક્ટોબર 2021માં 447, નવેમ્બર 2021માં 438 ડિસેમ્બર 2021માં 375 અકસ્માત થયા હતા. જ્યારે ચાલુ વર્ષે જાન્યુઆરી 2022માં 375, ફેબ્રુઆરીમાં 359 અકસ્માત, માર્ચમાં 392 એપ્રિલમાં 465 અકસ્માત, મે મહિનામાં 444, જૂન મહિનામાં 423 જૂલાઇમાં 457 લોકો ઢોરની અડફેટે ચડયા હતા.