BIG BREAKING / જુનિયર ક્લાર્ક પેપર લીક કેસ: ATSએ વધુ 10 આરોપીઓને દબોચ્યા, જાણો શું છે સમગ્ર મામલો

• જુનિયર ક્લાર્ક પેપરલીક કેસમાં ATSને મોટી સફળતા
• ગુજરાત ATSએ વધુ 10 આરોપીની કરી ધરપકડ
• અગાઉ 15થી વધુ આરોપીની કરી હતી ધરપકડ

09 એપ્રિલે જુનિયર ક્લાર્કની પરીક્ષા યોજાય તે પહેલા ગુજરાત એટીએસને મોટી સફળતા મળી છે. જુનિયર ક્લાર્ક પેપર લીક કેસમાં ગુજરાત ATSએ વધુ 10 આરોપીઓની ધરપકડ કરી છે. જુનિયર ક્લાર્ક પેપર લીક મામલે અત્યાર સુધીમાં 25થી વધુ આરોપીની ધરપકડ કરવામાં આવી છે. આપને જણાવી દઈએ કે, જુનિયર ક્લાર્ક પરીક્ષાનું વડોદરાથી પેપર લીક થયું હતું. જેને લઈને 9 લાખ 53 હજારથી વધુ ઉમેદવારોની મહેનત પાણીમાં ગઈ હતી.

અત્યાર સુધી 25થી વધુ આરોપીઓ ઝડપાયા
જુનિયર ક્લાર્ક પરીક્ષા પેપરલીંક મામલે ગુજરાત એટીએસ દ્વારા એક પછી એક તમામ આરોપીઓની ધરપકડ કરવામાં આવી રહી છે. એવામાં જુનિયર ક્લાર્ક પેપરલીક કેસમાં વધુ 10 આરોપી ઝડપાયા છે. છોટાઉદેપુર અને અરવલ્લી જિલ્લામાંથી પરીક્ષાર્થીઓની ધરપકડમાં કરવામાં આવી છે. પરીક્ષાર્થીઓ પર રૂપિયા આપીને પેપર મેળવવાનો આરોપ છે. ATSએ છોટાઉદેપુર જિલ્લામાંથી 8 પરીક્ષાર્થીને ઝડપ્યા છે. જેમાં મિતેષ કોલચા, વિજય રાઠવા, સુનિલ રાઠવા, ધ્રુવ રાઠવા, ત્રિકમ રાઠવા, દેવેન્દ્ર રાઠવા, હાર્દિક બારીયા અને પ્રિયંકા બારીયા સામેલ છે. તો બાયડના 2 અને મોડાસાના એક પરીક્ષાર્થીની ધરપકડ કરાઈ છે. આકાશ અરવિંદ પટેલ, આકાશ જશુભાઈ પટેલ અને ખંભીસરના દીપક્ષિકાબેન પટેલની ધરપકડ કરવામાં આવી છે.

 
જાણો જુનિયર કલાર્કનું પેપર કઈ રીતે અને ક્યાંથી થયું લીક
29 જાન્યુઆરીના રોજ યોજાનારી જુનિયર ક્લાર્કની પરીક્ષા મોકૂફ રાખવામાં આવી હતી. પરીક્ષાના પ્રશ્ન પત્ર સાથે એક વ્યક્તિની ધરપકડ કરાયા બાદ આ પરીક્ષા રદ્દ કરવામાં આવી હતી. મંડળ દ્વારા આજે ઉમેદવારોને પરીક્ષા કેન્દ્ર પર ન જવા અપીલ કરી હતી. પેપર મોકૂફ રખાતા 9 લાખ 53 હજારથી વધુ ઉમેદવારોની મહેનત પાણીમાં ગઈ હતી.  પેપરલીક કાંડ બાદ આમાં સંડોવાયેલા લોકોને ઝડપી પાડવા ATS એક્શનમાં આવી હતી. એટીએસ કામે લાગી હતી અને ધરપકડનો દોર શરુ કરી દેવામાં આવ્યો હતો. પેપર લીકકાંડના મુખ્ય આરોપી જીત નાયકને હૈદરાબાદથી ઝડપી લેવામાં આવ્યો હતો. 

હૈદરાબાદની કે.એલ. પ્રિન્ટિંગ પ્રેસમાંથી લીક થયું હતું પેપર 
હૈદરાબાદથી પકડાયેલો મુખ્ય આરોપી જીત નાયક પ્રિન્ટિંગ પ્રેસમાં કામ કરતો હતો. જેણે પેપર પ્રદીપ નાયકને આપ્યું હતું. પ્રદીપ નાયકને ATS દ્વારા પરીક્ષાની આગલી રાત્રે જ પકડી લેવામાં આવ્યો હતો. તેલંગાણામાં કે એલ હાઈટક નામની પ્રિન્ટિંગ પ્રેસ છે અને તેને પેપર પ્રિન્ટ કરવાનો કોન્ટ્રાક્ટ આપવામાં આવ્યો હતો. આ જ પ્રિન્ટિંગ પ્રેસમાં જીત કામ કરતો હતો અને તેણે ત્યાંથી પેપર લીક કર્યું હોવાનુ જાણવા મળી રહ્યું છે. આ પછી તેણે પેપર તેના સગા પ્રદીપને આ પેપર આપ્યું હતું. આ પછી પ્રદીપે મોરારી પાસવાન, નરેશ મોહંતીને 5-5 લાખમાં પેપર વેચવાનું નક્કી કર્યું હતું. ત્યારબાદ આરોપી મોરારી પાસવાને કમલેશને રૂ.6 લાખમાં પેપર વેચવાનું નક્કી કર્યું હતું. 

પેપર કાંડનું 20 દિવસ પહેલા જ ઘડાઇ ગયું હતુ ષડયંત્ર
તેમજ કમલેશે મહંમદ ફિરોઝને રૂ.7 લાખમાં પેપર વેંચવાનું નક્કી કર્યાનો પણ ધડાકો થયો હતો. વધુમાં આરોપી મહંમદ ફિરોઝ સર્વેશને રૂ.8 લાખમાં પેપર વેચવાનું અને સર્વેશે પ્રભાત કુમાર, મુકેશ, મીંટુએ રૂ.9 લાખમાં પેપર વેચવાનું નક્કી કર્યું હતું. તો મિંટુ કુમારે આ પેપર ભાસ્કર ચૌધરીને રૂ.10 લાખમાં અને ભાસ્કર ચૌધરીએ કેતન બારોટ, રાજ બારોટ, અનિકેત ભટ્ટ, ચિરાયુ અને ઇમરાનને રૂ.11 લાખમાં પેપર વેચવાનું નક્કી કર્યું હતું. સાથે સાથે કેતન, અનિકેત ભટ્ટ, રાજ બારોટ, હાર્દિક શર્મા, પ્રણય શર્માએ તેમના ઓળખીતાઓને રૂ.12 લાખમાં પેપર પહોંચાડી કાળી કમાણી કરવા કારસ્તાન ગોઠવ્યું હોવાનો ધડાકો થયો હતો

આરોપી ભાસ્કર ચૌધરી અંગે વધુ ખુલાસા 
આ ઉપરાંત પેપરલીક કાંડના આરોપી ભાસ્કર ચૌધરી મામલે પણ ખુલાસો થયો હતો. જેમાં આરોપી ભાસ્કર ચૌધરી પોતાને શિક્ષણ ક્ષેત્રમાં નંબર વન એક્સપર્ટ ગણાવતો હતો. એટલું નહિ તે ક્લાસીસ ચલાવતો જેમાં JEE સહિતની પરીક્ષાઓ પણ લેવાતી હતી. ભાસ્કર ચૌધરીનું દિલ્હીમાં પણ એક ક્લાસીસ આવેલું છે. દિલ્હીથી પણ અન્ય રાજ્યમાં એડમિશન અપાવતો હતો. તેમજ ગુજરાત બહાર મેડિકલ-એન્જિનિયરિંગના વિદ્યાર્થીઓને ઓડમિશન પણ અપાવતો હતો. સાથે કોલેજો-યુનિવર્સિટીઓમાં એડમિશન અપાવવા માટે કન્સલ્ટિંગનું પણ કામ કરતો હતો. જાણવા મળતી વિગત અનુસાર છેલ્લા 10 વર્ષમાં 90 હજારથી વધુ વિદ્યાર્થીઓના એડમિશન અપાવ્યાનો દાવો કરતો હતો..