દાહોદ જિલ્લાના કેળકુવા ગામે હેન્ડ પંપમાંથી પાણી ભરવા બાબતે પિતાની હત્યા નિપજાવી પુત્ર નાશી છૂટયો હતો.
દાહોદમાં પુત્રએ જ કરી પિતાની હત્યા
હેન્ડ પંપ પર પાણી ભરવા બાબતે ખેલાયો ખૂની ખેલ
અન્ય પરિજન છોડાવવા જતા તમામને ધમકી આપી આરોપી ફરાર
દાહોદ જિલ્લાના દેવગઢબારીઆના કેળકુવા ગામે હચમચાવી દેતી હત્યાની ઘટના પ્રકાસમાં આવી છે. જેમાં કપાતર પુત્રએ પિતા સાથે માથાકૂટ કરી પિતાને મોતને ઘાટ ઉતારી દેતા સમગ્ર પંથકમાં હાહાકાર મચી જવા પામ્યો છે. હેન્ડ પંપ પર પાણી ભરવા જેવી નજીવી બાબતે પિતા-પુત્ર વચ્ચે ખૂની ખેલ ખેલાયો હોવાના વાવડ વહેતા થતાં ચકચાર મચી જવા પામી છે. જ્યારે પિતાની હત્યાને અંજામ આપી પુત્ર ફરાર થઇ ગયો છે.
પિતાનુ બેરહેમીથી ગળુ દબાવી દેતા મોત
આ રક્તરંજીત ઘટનાની જાણવા મળતી પ્રાથમિક વિગત અનુસાર દેવગઢબારીઆ તાલુકાના કેળકુવા ગામે પિતા હેન્ડ પંપ પર પાણી ભર્યું હતું. ત્યારબાદ આ વેળાએ પુત્ર ત્યાં આવ્યો હતો. જ્યાં મારા બનાવેલા હેન્ડ પંપમાંથી પાણી કેમ ભરો છો તેમ કહી પિતા સાથે ડખ્ખો કરવા લાગ્યો હતો. આ દરમિયાન ઉશ્કેરાઇ જઈ પુત્રએ બેફામ મારામારી કરી હતી. આરોપી પુત્રએ પિતા પર હુમલો કરી ઉપરાછાપરી ઢીકાપાટુનો માર માર્યો હતો. પિતા-પુત્ર વચ્ચેની ઝપાઝપી દરમિયાન પિતાએ બૂમાં બૂમ કરતા આજુબાજુના રહેવાસીઓ અને અન્ય પરિવારજનો બચાવવા વચ્ચે પડ્યા હતા. આરોપીએ આ તમામને પણ ધમકી આપી હતી. પિતાને ગંભીર ઇજા પહોંચતા લોહીલુહાણ હાલત થઇ હતી. ત્યારબાદ ભાન ભૂલી બેઠેલ પુત્રએ વિચાર કર્યા વગર પિતાનુ બેરહેમીથી ગળુ દબાવી દેતા પિતાનું પ્રાણ પંખેરુ ઊડી ગયું હતું અને મામલો હત્યામાં પટકયો હતો.
હત્યાને અંજામ આપી આરોપી નાશી છૂટયો
પિતાને બચાવવા વચ્ચે પડેલ પરિજનોને પણ પતાવી દેવાની ધમકી આપી એને હત્યાના વારદાતને અંજામ આપી આરોપી નાશી છૂટયો હતો. આ મામલે સ્થાનિક પોલીસને જાણ કરવામાં આવતા પોલીસ તત્કાલીક ઘટનાસ્થળે દોડી ગઈ હતી. જ્યાં પોલીસે સ્થાનિકના નિવેદન નોંધી પાંચનામું કર્યા બાદ આરોપી પુત્ર વિરુદ્ધ ગુનો નોંધ્યો હતો અને આરોપી પુત્રને ફરારી જાહેર કરી તેને દબોચી લેવા તપાસના ચક્રો ગતિમાન કર્યા છે. આમ પિતા-પુત્રના સબંધની હત્યા સમાન આ ઘટનાથી નાનું એવું કેળકુવા ગામ શોકના સાગરમાં ડૂબ્યું છે અને મૃતકના પરિવારની ખુશી છિન્નભિન્ન થઇ ગઈ છે.