સંશોધન / પૃથ્વીને માથે મોટું સંકટ! માઉન્ટ એવરેસ્ટથી પણ વિશાળ એસ્ટરોઇડ ટકારાવાનો ખતરો

નાસાના એકસપર્ટસના મતે આ એસ્ટરોઇડ (Asteroid) 2027માં પૃથ્વી સાથે ટકરાય તેવો ખતરો છે. જો તે ટકરાશે તો માનવી સહિત પૃથ્વીની અડધોઅડધ જીવસૃષ્ટિ નાશ પામશે. નાસા (NASA) ની એસ્ટરોઇડને ટ્રેક કરતી ટીમે તેને 4953(1990 MU) નામ આપ્યું છે. વિશાળ કદના એસ્ટરોઇડનો ડાયામીટર 10 કિલોમીટર જેટલો છે. તે 2027 પહેલા અનેક વખત પૃથ્વીની નજીકથી પસાર થશે. પરંતુ વિજ્ઞાનીઓની ગણતરી મુજબ તે 6 જુન, 2027ના દિવસે પૃથ્વીની સૌથી વધુ નજીક આવશે. 

આ દિવસે તે પૃથ્વીથી 29 લાખ કિલોમીટર દુર હશે. 29 લાખ કિલોમીટર બહુ વધારે અંતર લાગે પણ અતરિક્ષની રીતે આ અંતર બહુ ઓછું અને જોખમી ગણાય છે. એસ્ટરોઇડ પૃથ્વી સાથે અથડાશે કે નહીં તે માટે કેટલાક પરીબળો કઇ રીતે કામ કરે છે તેના પર બધો આધાર છે. પૃથ્વી સહિતના ગ્રહોનું ગુરુત્વાકર્ષણ બળ બહુ જબરદસ્ત હોય છે. પૃથ્વીના ગ્રેવિટેશનલ કી હોલ તરીકે ઓળખાતી ચોક્કસ જગ્યાએથી પસાર થાય તો તેની પૃથ્વી સાથેની અથડામણની શકયતા વધી જાય છે.

ગ્રેવિટેશનલ કી હોલ એ સ્થળ છે જ્યાંથી પસાર થતી એસ્ટરોઇડ સહિતની ચીજ જે તે ગ્રહના ગુરુત્વાકર્ષણ બળથી તેના તરફ ખેંચાય છે. પૃથ્વીના સદનસીબે કેટલીય સદીઓથી આવી કોઇ અથડામણ થઇ નથી. કાર્ડિફ યુનિવર્સિટીની સ્કુલ ઓફ અર્થ એન્ડ ઓસન સાયન્સીસના જાણીતા વિજ્ઞાની ડો. લેન મેકડોનાલ્ડ કહે છે કે ભવિષ્યમાં કોઇ મોટો એસ્ટરોઇડ પૃથ્વી પર મહાવિનાશ વેરે તેવી પુરેપુરી શકયતા છે. આપણે આવી અથડામણથી બચવાના ફુલપ્રુફ પ્લાન પર ગંભીરતાથી કામ શરુ કરી દેવું જોઇએ.