CM રૂપાણીનો દ્વારા ગુજરાતના 6 મહિલા ખેલાડીઓ માટે પ્રોત્સાહક જાહેરાત, ટોક્યો ઑલિમ્પિકની રમતમાં પ્રતિનિધિત્વ કરનારી મહિલા ખેલાડીઓ રૂપિયા 10 લાખની સહાય
CM રૂપાણી દ્વારા ગુજરાતના ખેલાડીઓ માટે જાહેરાત
પ્રત્યેક ખેલાડીઓને અપાશે 10 લાખની સહાય
ગુજરાતની 6 મહીલા ખેલાડીઓ માટે પ્રોત્સાહક નિર્ણય
ગુજરાત રાજ્યની સ્થાપના બાદના 60 વર્ષના ઇતિહાસમાં પ્રથમ વખત રાજ્યના 6 ખેલાડીઓ આગામી ઑલિમ્પિક રમતોમાં ભારત દેશનું પ્રતિનિધિત્વ કરવાના છે. 23મી જુલાઇથી ટોકિયો ખાતે યોજાનારી ઑલિમ્પિક ગેઇમ્સ ર૦ર૧માં ગુજરાતની એકસાથે 6 નારીશક્તિ એટલે મહિલા ખેલાડીઓની પસંદગી થઇ છે. જેને લઈ ગુજરાતના મુખ્યમંત્રી વિજય રૂપાણીએ રાજ્યની નારીશક્તિની સ્પોર્ટ્સ ક્ષેત્રે આ વૈશ્વિક સિધ્ધિને પ્રોત્સાહિત કરતા ગુજરાતની છ દિકરીઓને રૂપિયા 10-10 લાખની નાણાકીય સહાય આપવાનો નિર્ણય કર્યો છે.
ગુજરાતની આ છ દિકરીઓ જેમને પ્રત્યેકને આ 10 લાખ રૂપિયાની સહાય મળશે. આ ખેલાડીઓમાં માના પટેલ સ્વિમિંગમાં, એલા વેનિલ વાલારિવન શૂટિંગમાં, અંકિતા રૈના ટેનીસમાં, સોનલ પટેલ તથા ભાવિના પટેલ પેરા ટેબલ ટેનિસમાં અને પારુલ પરમાર પેરા બેડમિન્ટન રમતમાં ભાગ લેશે. ટોક્યો ઓલમ્પિક-પેરા ઓલમ્પિક ખાતે વિશ્વના અન્ય દેશના ખેલાડીઓ સાથે ગુજરાતની 6 મહિલા ખેલાડી સ્પર્ધામાં ઉતરશે.
CM રૂપાણીએ આ 6 પ્રતિભાવંત મહિલા ખેલાડીઓને દરેકને રૂ. ૧૦ લાખની નાણાકીય આપવા સાથે આગામી ટોક્યો ઓલમ્પિક-પેરા ઓલમ્પિકમાં આ દિકરીઓ ગુજરાતનું નામ રોશન કરે તેવી શુભેચ્છાઓ પણ પાઠવી છે. મહત્વનું છે કે, ટોક્યો ઓલમ્પિક -2021 રમતો આ વર્ષે ર૩મી જુલાઇ 2021થી ૮ ઓગસ્ટ સુધી અને પેરા ઓલમ્પિક રમતો ૨૪ ઓગસ્ટથી ૫ સપ્ટેમ્બર સુધી જાપાનના ટોક્યો ખાતે યોજાવાની છે.