ચૂંટણી / આજના પરિણામોએ ભાજપને ટૅન્શનમાં મૂકી દીધું, ક્યાંક મળ્યાં જોરો કા ઝટકા તો ક્યાંક ધીરે સે

• મહારાષ્ટ્રમાં ભાજપ-શિવસેના ગઠબંધન આગળ
• હરિયાણામાં કોઇ પાર્ટીને બહુમતી નહીં
• JJP બની શકે કિંગમેકર

અત્યાર સુધીનાં પરિણામોને જોતાં, એક વાત સ્પષ્ટ થઈ ગઈ છે કે મે મહિનામાં લોકસભાની ચૂંટણીમાં ભાજપને મળેલી સફળ જીત બાદ પહેલી વિધાનસભાની ચૂંટણીમાં પાર્ટીની જીત ઝાંખી લાગી રહી છે. નોંધનીય છે કે, ભાજપના ઘણા દિગ્ગજ ઉમેદવારો ચૂંટણી હારી ગયા છે. હરિયાણામાં પ્રદેશ પ્રમુખ સુભાષ બરાલા પણ પોતાની બેઠક બચાવી શક્યા નહીં. અપેક્ષિત અને સખત પ્રચાર પછી પણ બંને રાજ્યોમાં ભાજપનું પ્રદર્શન મજબૂત રહ્યું ન હતું. 

PM મોદીએ પોતે ચૂંટણીની કમાન રાખી પોતાના હાથમાં 

આ ચૂંટણીઓમાં 370, બાલાકોટ, પાકિસ્તાન જેવા મુદ્દાઓનું વર્ચસ્વ હતું પરંતુ પરિણામ સ્પષ્ટ છે કે લોકોએ સ્થાનિક મુદ્દાઓને પ્રાધાન્ય આપ્યું છે. પ્રધાન મંત્રી નરેન્દ્ર મોદીએ ખુદ ચૂંટણી પ્રચારની કમાન પોતાના હાથમાં લીધી, પરંતુ ભાજપનો જાદુ પહેલાની જેમ આગળ વધી શક્યો નહીં.

શું કહે છે ચૂંટણી પંચના આંકડા 

ચૂંટણી પંચના આંકડાને ધ્યાને લેતા મહારાષ્ટ્રની 288 બેઠકો પૈકી ભાજપને 102, કોંગ્રેસને 47, NCP ને 53, તથા શિવસેનાને 57 બેઠકો પ્રાપ્ત થઇ હતી. ત્યારે આ તરફ હરિયાણામાં મનોહર લાલ ખટ્ટર માટે પરિસ્થિતિ પડકારરૂપ છે. ભાજપની સંખ્યા બહુમતીથી પહેલા અટકી ગઇ છે. ત્યારે કોંગ્રેસ પણ બહુમતીના આંકડાથી ઘણી દૂર છે. જોકે, હાલમાં હરિયાણામાં ત્રિશંકુ વિધાનસભાની સ્થિતિ બની રહી છે.

મહારાષ્ટ્રમાં NCP નું શાનદાર પ્રદર્શન, ભાજપના કેટલાય નેતાનો કારમો પરાજય

મહારાષ્ટ્રમાં ભાજપ ગઠબંધનની સરકાર બનવામાં કોઇપણ પ્રકારની અડચણ દેખાઈ રહી નથી. જો કે, ભાજપને મોટું નુકસાન ભોગવવાનો વારો આવ્યો છે. ફડણવીસ સરકારના 5 મંત્રી પંકજા મુંડે, રામ શિંદે, વિજય શિવતારે, બાલા ભેગડે, અર્જુન ખોતકરે હારનો સામનો કરવો પડ્યો છે. 

ભાજપને સમર્થન આપશે JJP: સૂત્ર

સૂત્રો દ્વારા મળતી માહિતી અનુસાર દુષ્યંત ચૌટાલાની પાર્ટી જેજેપી હરિયાણામાં સરકાર બનાવવા માટે ભાજપને સમર્થન આપશે. જોકે, આ પહેલા એવા સમાચાર આવ્યા હતા કે જેજેપી કોંગ્રેસને સમર્થન આપવા માટે મુખ્યમંત્રી પદની શરત રાખી હતી પરંતુ હવે જે જાણકારી મળી રહી છે તે સમીકરણ બદલનારી છે. હરિયાણામાં જેજેપી ભાજપને ટેકો આપી શકે છે.

પોતાની બેઠક બચાવી ન શક્યા ભાજપના પ્રદેશ અધ્યક્ષ

ટિકટોક સ્ટાર અને ભાજપના ઉમેદવાર સોનાલી ફોગાટ હરિયાણામાં ચૂંટણી હારી ગયા છે. કોંગ્રેસના ઉમેદવાર રણદીપ સુરજેવાલાને પણ પોતાની બેઠક ગુમાવવાનો વારો આવ્યો છે.  ભાજપના પ્રદેશ અધ્યક્ષ સુભાષ બરાલા, કેપ્ટન અભિમન્યુ, યોગેશ્વર દત્ત, બબીતા ફોગાટને પણ ચૂંટણીમાં કારમી હારી મળી છે.