BIG NEWS / આસામમાંથી બે આતંકી ઝડપાયા: પોલીસ તપાસમાં અલ કાયદાના સભ્યો હોવાનો કર્યો ખુલાસો

• આસામ પોલીસને મળી મોટી સફળતા
• બે શંકાસ્પદ આતંકીઓની કરી ધરપકડ
• આ આતંકીઓના અલ કાયદા સાથે જોડાયેલ હોવાના સબૂત મળ્યા

આસામ પોલીસને મોટી સફળતા મળી છે. પોલીસે શનિવારે રાતના બે શંકાસ્પદ આતંકીઓની ધરપકડ કરી છે. આ બંને સંદિગ્ધોના અલ કાયદા (AQIS)  અને અંસારુલ્લાહ બાંગ્લા ટીમ (ABT) સાથે જોડાયેલ હોવાના પાક્કા પુરાવા મળ્યા છે. પોલીસે જણાવ્યું છે કે બંને ગોલપારા જિલ્લામાંથી ઝડપાયા છે. હાલમાં તેમની સાથે પૂછપરછ થઈ રહી છે. 

પૂછપરછમાં કબૂલી આતંકી સંગઠનના સભ્યો હોવાની વાત

ગોલપારા એસપી વીવી રાકેશ રેડ્ડીએ જણાવ્યું હતું કે, બંને શંકાસ્પદના આતંકી સંગઠનો સાથે સીધો સંપર્ક છે. ઘરની શોધ કરતા તેમને અલ કાયદા સાથે જોડાયેલા હોવાના સબૂતો મળ્યા છે. તેની સાથે જ જેહાદી તત્વો, પોસ્ટર અને અન્ય વાંધાજનક સામગ્રીઓ જપ્ત થઈ છે. તેમના મોબાઈલ ફોન, સિમ કાર્ડ અને આઈડી કાર્ડ જપ્ત કરી લેવામાં આવ્યા છે. અધિકારીઓએ જણાવ્યું છે કે, બંને શંકાસ્પદ બાંગ્લાદેશથી આવેલા જેહાદી આતંકીઓના રાશનની વ્યવસ્થા કરી રહ્યા હતા. આ ઉપરાંત તેમને આશરો આપ્યો હતો. તેમણે જેલમાં સ્લિપર સેલની ભરતી માટે AQISના સભ્ય હોવાની વાત કબૂલી છે. 

પહેલા પણ 3 આતંકી પકડાયા હતા

આ અગાઉ આસામના ગોવાલપાડા જિલ્લામાંથી ત્રણ આતંકીઓ ઝડપાયા હતા. પોલીસ તેમની સાથે પણ પૂછપરછ કરી રહી છે. કહેવાય છે કે, પોલીસે તેમને એક અભિયાન દરમિયાન ધરપકડ કરી હતી. તેમાંથી બે લોકોની ઓળખાણ અબ્દુલ શોભન અલી અને જલાલઉદ્દીન તરીકે થઈ છે. અબ્દુલ શોભન અલી આયશા સિદ્દીકાી મદરસાનો ઈમામ હોવાનું કહેવાય છે. 

પોલીસ સૂત્રોના જણાવ્યા અનુસાર, આ બંને ઉપરાંત શોભન અલીના મોટા ભાઈ અને ભત્રીજા સાથે પણ પૂછપરછ ચાલી રહી છે. હાલમાં પોલીસ તેમની ભૂમિકા અને તેઓ ક્યા જૂથના છે કે નહીં તેની તપાસ કરી રહી છે. ઉલ્લેખનિય છે કે, આસામ પોલીસ કથિત રીતે રાજ્યમાં એક્ટિવ એક શંકાસ્પદ જેહાદી આતંકી મોડ્યૂલનો ભાંડાફોડ કરવા માટે કેન્દ્રીય એજન્સીઓની સાથે નજીકથી સમન્વય સાધીને કામ કરી રહી છે.