વાયરલ / VIDEO : કોંગ્રેસ માટે એક સાંધે ત્યાં તેર તૂટેની સ્થિતિ, ભારત જોડો યાત્રાની મીટિંગમાં બાખડ્યાં કાર્યકરો

• આસામના ધુબરીના રાજીવ ભવનમાં કોંગ્રેસ કાર્યકરોના બે જૂથ વચ્ચે બબાલ 
• રાહુલ ગાંધીની ભારત જોડો યાત્રાને લઈને થઈ રહી હતી ચર્ચા 
• ધૂબરી યુનિટ પ્રેસિડન્ટ પર આરોપ લાગતા થયો મોટો વિવાદ 

દેશમાં કોંગ્રેસ માટે એક સાંધે ત્યાં તેર તૂટે વાળો ઘાટ સર્જાયો છે. એક ઠેકાણે અસંતોષની આગ ઠરી ન ઠરી કે બીજે ઠેકાણે લાગી જાય છે અને આ બધામાં પાર્ટીની છાપ વધુ ખરાબ થતી જાય છે. કોંગ્રેસ રાજસ્થાન સંકટનો સામનો કરી રહી છે ત્યાં હવે આસામ કોંગ્રેસમાં પણ બે જૂથ પડી ગયા હોવાનું સામે આવ્યું છે. 

ધુબરીમાં કોંગ્રેસ કાર્યકરોના બે જૂથ વચ્ચે તકરાર 
1 નવેમ્બરે રાહુલ ગાંધીની ભારત જોડો યાત્રા આસામમાં પ્રવેશી રહી છે. રાહુલ ગાંધીની આ યાત્રાની ચર્ચા કરવા માટે ધુબરી જિલ્લામાં રાજીવ ગાંધી ભવનમાં કોંગ્રેસ કાર્યકરોની એક બેઠક બોલાવાઈ હતી પરંતુ બેઠક જે હેતુ માટે બોલાવાઈ તે તો બાજુમાં રહી ગયો અને આખી બેઠક વિવાદમાં ફેરવાઈ ગઈ. 

#WATCH | Assam: Clash b/w two groups of Congress workers broke out during a meeting held at Rajiv Bhawan in Assam's Dhubri district on Monday. The meeting was organized to discuss the Bharat Jodo Yatra to be started in the state from November 1. pic.twitter.com/LEFQ4jdrie

— ANI (@ANI) September 26, 2022

ધૂબરી યુનિટ પ્રેસિડન્ટ પર આરોપ લાગતા એક જૂથ ઉકળી ઉઠ્યું 
બેઠકમાં કાર્યકરોના એક જૂથે ધૂબરી યુનિટ પ્રેસિડન્ટ પર કેટલાક આરોપ લગાવ્યાં હતા. પોતાના પ્રેસિડન્ટ પર આરોપ લાગતા કાર્યકરો ઉશ્કેરાઈ ગયા હતા અને સામેવાળા જૂથ સાથે વિવાદ કરવા લાગ્યા હતા. પછી તો વિવાદ ખૂબ વધી ગયો હતો અને એક તબક્કે તો મારામારીની પણ નોબત આવી ગઈ હતી. ન્યૂઝ એજન્સી એનએનઆઇએ પણ આ ઘટનાનો વીડિયો ટ્વીટ કર્યો છે. આવામાં બંને પક્ષ એકબીજા સાથે ગૂંચવાયેલા જોવા મળી રહ્યા છે. જણાવવામાં આવી રહ્યું છે કે આ દરમિયાન કેટલાક વરિષ્ઠ નેતાઓને શારીરિક નિશાન બનાવવાનો પણ પ્રયાસ કરવામાં આવ્યો હતો. જો કે આ ઘટના કોંગ્રેસની ટોચની નેતાગીરી માટે ચિંતાનો વિષય બની શકે છે.