સેવા / આ 'અસ્મિતા' ગુજરાતની: 6 માસની દીકરીને કૂખે બાંધી ફરજ નિભાવતી રાજકોટની આરોગ્ય કર્મી, ફરજ નિષ્ઠા પર ગર્વ

• 6 માસની દીકરીને છાતીએ વળગાડી ફરજ પર આરોગ્ય કર્મી 'અસ્મિતા'
• રાણી લક્ષ્મીબાઈ જેમ બનીને કોરોના સામે યુદ્ધ
• લોધિડા સબ સેન્ટરનાં કોમ્યુનિટી હેલ્થ ઓફિસર તરીકે બજાવે ફરજ

રાજકોટના સરધારના પ્રાથમિક આરોગ્ય કેન્દ્ર આવેલા લોધિડા સબ સેન્ટરનાં કોમ્યુનિટી હેલ્થ ઓફિસર અસ્મિતાબેન કોલડિયાનું કામ જોઈ આરોગ્ય વિભાગ ગદગદિત થઈ ગયું છે. કારણ એક જ છે તેમની ફરજ નિષ્ઠા, કારણ એક જ છે તેમની કોરોનાને હરાવવાની જીદ. કારણ કે તેઓ 6 માસની દીકરીને છાતીએ બાંધીને રોજ ગામડાંમાં વેક્સિન આપવા જતાં રહે છે. ગામના ઘરે ઘરે જઈ હજુ પણ વેક્સિનથી વંચિત રહેલા લોકોને પ્રેરણા આપી છોકરું કૂખે બાંધી પોતાની ફરજ પર હાજર થઈ જાય છે અને લોકોને રસી આપવાની ઝુંબેશમાં પોતાનું યોગદાન આપે છે.

અસ્મિતાબેન કોલડિયાએ કહ્યું  છે કે તેઓ 2 વર્ષથી આરોગ્ય કર્મી તરીકે ફરજ બજાવે છે. જેમ ઝાંસીની રાણી લક્ષ્મીબાઇ તેના બાળકને લઇને યુદ્વના મેદાનમાં ઊતર્યાં હતાં એવી જ રીતે હું પણ મારી 6 માસની બાળકીને લઇને કોરોના સામેની લડતમાં નિષ્ઠાથી મારી ફરજ પર કામ કરી રહી છું. અને આ કાર્ય કરતાં મને ખૂબ ગર્વ અને આનંદ થાય છે જ્યારે હું કોઈને તકલીફમાં મદદ કરું છું અને કોઈને તકલીફમાં જતાને રસી આપીને બચાવી લઉં છું.

7મી વાર ઘરે ઘકકો ખાઈ વૃદ્ધાને આપી રસી
તેમણે પોતાની વાત રજૂ કરતાં એ પણ કહ્યું કે હજુ પણ ગામડામાં એવા કેટલાય લોકો છે જે કોરોના રસી લેવા ડરી રહ્યા છે. એક પ્રસંગને વાગોળતાં કહ્યું કે લોધિડા ગામમાં સાતમી મુલાકાતમાં સમજાવટ બાદ રસી મુકાવવા સંમત થયેલાં વૃદ્ધાને રસી આપી હતી. આ વૃદ્ધા રસી લેવા ડરી રહ્યા હતા પણ મે નક્કી કર્યું હતું કે ગમે તેટલા ધક્કા થાય પણ વૃદ્ધને નાનકડી સોઈની બીક મનમાંથી કઢાવીને રસી અપાવીને રહીશ.

6 માસની દીકરીની પણ રાખે છે સુરક્ષા
કોરોના કાળમાં પોતાની 6 માસની દીકરી અને પોતાની સુરક્ષા કરવી પણ વધારે મહત્વની છે પણ પોતાની આ અંગત જવાબદારીની પરવા કર્યા વગર ગામેગામ કોરોના રસી આપી એક અલગ જ રસ્તો કંડેરી રહી છે. ફરજ પર પોતાના બાળકનું પણ ખૂબજ ધ્યાન રાખી વેકીસન ઝુંબેશને ઘરે ઘરે જઈ સાકાર કરી રહી છે.રાજકોટ જિલ્લા વહીવટીતંત્ર અને આરોગ્ય વિભાગ  તેમજ આરોગ્ય મંત્રી ઋષિકેશ પટેલ દ્વારા પણ ગુજરાતની આ ફરજ નિષ્ઠ અસ્મિતાના ભારોભાર વખાણ થઈ રહ્યા છે.