ગાંધીનગર / પેપરલીક પર સૌથી મોટા બ્રેકિંગ ન્યૂઝ: પહેલીવાર સામે આવ્યા અસિત વોરા, જાણો શું કહ્યું

• પોલીસને કોઈ પુરાવા મળશે તો મંડળ ફરિયાદ દાખલ કરશેઃ અસિત વોરા 
• પેપરલીક અંગે ગૃહમંત્રી હર્ષ સંઘવીની આજે બેઠક બોલાવી હતી
• બેઠકમાં પહેલા અસિત વોરાએ મૌન સેવ્યું હતું 

પોલીસને કોઈ પુરાવા મળશે તો મંડળ ફરિયાદ દાખલ કરશેઃ અસિત વોરા 
    
હેડ ક્લાર્કની પરીક્ષામાં પેપર લીક મામલે ગૌણ સેવા પસંદગી બોર્ડના ચેરમેન અસિત વોરા ગાંધીનગરમાં એક પ્રેસ કોન્ફરન્સને સંબોધતા જણાવ્યું હતું કે, રાજ્યમાં 88 હજાર ઉમેદવારોએ હેડ કલાર્કની પરીક્ષા આપી છે, સરકારને બીજા દિવસે ટીવી મીડિયાથી અમને ખબર પડી કે પેપરલીક થયું છે. મંડળ પાસે આજદિન સુધીમાં પેપરલીક મામલે કોઈ જ ફરિયાદ આવી નથી. હાલ આ મામલે સાબરકાંઠામાં 16 ટીમો દ્વારા સઘન તપાસ ચાલી રહી છે.અને જો ગેરરીતિ જણાશે તો કડકમાં કડક પગલાં લેવાશે. તેમજ તેણે ઉમેર્યું હતું કે, પેપરલીક થયું હોય તેવા કોઈ જ નક્કર પુરાવા અમને મળ્યા નથી, પોલીસને કોઈ પુરાવા મળશે તો મંડળ ફરિયાદ દાખલ કરશે 

પેપરલીક મામલે જગદીશ ઠાકોરે પણ સરકાર સામે પ્રહાક કર્યા હતાં 

પેપરલીક મામલે જગદીશ ઠાકોરે પોતાની પ્રતિક્રિયા આપતાં જણાવ્યું હતું કે, આ પહેલું પેપર લીક નથી થયુ આ પહેલા પણ ઘણાં પેપર લીક થયાં છે. તેમણે વધુમાં ઉમેર્યું હતું કે,માહિતી આપનારને ડર છે કે, સરકાર જેલમાં તો નહીં નાખી દે ને? તેમણે કહ્યું બેરોજગાર યુવાનો ને સરકાર પરથી વિશ્વસ ઉઠી ગયો આ સાથે સરકાર પર પ્રહારો કરતાં કહ્યું કે,પેપર લીકની માહિતી આપો તો જેલ થાય છે. દારૂ-ડ્રગ્સ ની માહિતી આપો તો જેલ થાય છે. સરકાર આ તમામને મદદ કરી રહી છે 

પેપરલીક અંગે ગૃહમંત્રી હર્ષ સંઘવીની આજે બેઠક બોલાવી હતી

ઉલ્લેખનીય છે કે, ગુજરાત ગૌણ સેવા પસંદગી મંડળ દ્વારા લેવાતી લેખિત પરીક્ષાઓમાં અવારનવાર પેપર લીક થવાની ફરિયાદો ઉભી થતી રહી છે. ત્યારે પેપરલીકના આરોપો વચ્ચે રાજ્યનું ગૃહમંત્રાલય એક્શન મોડમાં આવી ગયું છે. આજે ગાંધીનગર ખાતે રાજ્યના ગૃહમંત્રી હર્ષ સંઘવીની અધ્યક્ષતામાં એક બેઠક યોજાઈ હતી.આ બેઠકમાં ગૌણ સેવા પસંદગી બોર્ડના ચેરમેન અસિત વોરા સહિતના અધિકારીઓ હાજર રહ્યાં હતાં.

પેપરલીક અંગેની બેઠકમાં પહેલા અસિત વોરાએ મૌન સેવ્યું હતું 

રાજ્યના ગૃહમંત્રી હર્ષ સંઘવીની અધ્યક્ષતામાં યોજાયેલી બેઠકમાં પહોંચતા પહેલા પેપરલીક અંગે VTVના પત્રકારે સવાલો પૂછાતા અસિત વોરાએ મૌન સેવ્યું હતું. મહત્વનું છે કે, આ બેઠક પહેલા પેપરલીક પર કંઈ પણ કહેવાનો ઈન્કાર કર્યો હતો. તેમજ પત્રકારો દ્વારા પુછવામાં આવેલા સવાલો જવાબ આપ્યા વગર જ લીફ્ટની જગ્યાએ સિડી દ્વારા જ બેઠકમાં પહોચી ગયાં હતાં.