કોલકાતામાં એશિયાનું સૌ પ્રથમ એવું કાફે ખુલ્યું છે કે જેમાં માત્ર HIV પોઝિટિવ કર્મચારીઓ જ કામ કરે છે.
કોલકાતામાં ખુલ્યું એક ખાસ કાફે
તમામ કર્મચારીઓ છે HIV પોઝિટિવ
એશિયામાં છે આ પ્રકારનું પ્રથમ કાફે
સામાન્ય રીતે આપણે જોયું હશે કે HIV પોઝિટિવ લોકો માટે નોકરી મેળવવી ખૂબ મુશ્કેલ જ હોય છે. ત્યારે કેટલીક એવી સંસ્થાઓ અને સંગઠનો પણ હોય છે કે જે આવાં લોકો માટે જ કામ કરે છે. ત્યારે આવું જ એક કાફે કોલકાતામાં ખોલવામાં આવ્યું છે. જેમાં કામ કરતા તમામ કર્મચારીઓ HIV પોઝિટિવ છે. HIV પોઝિટિવ સ્ટાફ દ્વારા ચલાવવામાં આવતું આ એશિયાનું પ્રથમ કાફે છે.
હેતુ માત્ર નોકરી ઊભી કરવી
એક ખાનગી ન્યુઝ અખબારનાં અહેવાલ મુજબ, તેને 'કાફે પોઝિટિવ' (Cafe Positive) નામ આપવામાં આવ્યું છે. જેનો હેતુ એચઆઈવી પોઝિટિવ લોકો માટે જાગૃતિ લાવવી અને રોજગારીનું સર્જન કરવાનો છે. આ કાફે આનંદઘર (Anandghar) NGO દ્વારા ચલાવવામાં આવે છે. તેની સ્થાપના કલ્લોલ ઘોષે કરી છે. આ NGO વિકલાંગ બાળકો અને HIV પોઝિટિવ લોકો માટે કામ કરે છે.
ફ્રેન્કફર્ટના કાફે દ્વારા પ્રેરિત
કલ્લોલ ઘોષનું કહેવું છે કે, તેઓ ફ્રેન્કફર્ટ (Frankfurt) ના એક કાફેથી પ્રેરિત થયા હતાં કે જે સંપૂર્ણપણે HIV પોઝિટિવ લોકો દ્વારા ચલાવવામાં આવે છે. જે જગ્યાએ આ કાફે ખુલ્યું છે તે સ્થળ કોફી અને સેન્ડવીચ માટે ખૂબ પ્રખ્યાત છે. મોટા ભાગે નોકરીયાત લોકો અને કોલેજના વિદ્યાર્થીઓની ભીડ જોવા મળી રહી છે.
30 કાફે ખોલવાની છે યોજના
ઘોષ કહે છે કે, તેઓ ભારતમાં આવાં 30 કાફે ખોલવાની યોજના વિચારી રહ્યાં છે. આવી સ્થિતિમાં તેઓએ 800 લોકોને ટ્રેનિંગ માટે શોર્ટલિસ્ટ કર્યા છે. તેઓનું કહેવું છે કે, શરૂઆતમાં કાફે ખોલતી વખતે એવી આશંકા હતી કે તે બરાબર નહીં ચાલે. પરંતુ હવે લોકો આવવા લાગ્યા છે. જો કે, જ્યારે તેમને ખબર પડે છે કે અહીં કામ કરતા લોકો HIV પોઝિટિવ છે તો કેટલાંક લોકો રોકાય છે અને કેટલાક જતા રહે છે.