ભારતીય ક્રિકેટ ટીમના ઓલરાઉન્ડર રવીન્દ્ર જાડેજાનાં ચાહકો સમગ્ર દેશમાં છે. ઓસ્ટ્રેલિયાનાં એક ખેલાડીએ આજે જયારે પોતાનું શ્રેષ્ઠ પ્રદર્શન આપ્યું ત્યારે રવીન્દ્ર જાડેજાને રોકસ્ટાર ગણાવ્યા. આ બોલરનું નામ છે એશ્ટન એગર. એગરે આજે સાઉથ આફ્રિકા સામેની ટી 20 મેચમાં હેટ્રિક હાંસલ કરી અને મેચમાં કુલ પાંચ વિકેટ ઝડપીને મોટા મોટા ધુરંધરોને પવેલિયન ભેગા કરી દીધા. એગરે કહ્યું કે રવીન્દ્ર જાડેજા તેમના ફેવરીટ ખેલાડી છે અને જાડેજાએ તેમને બોલ સ્પીન કરતા શીખવાડ્યું હતું.
એશ્ટન એગરનું પોતાની કરિયરનું શ્રેષ્ઠ પ્રદર્શન
રવીન્દ્ર જાડેજાથી ખૂબ પ્રભાવિત એગર જાડેજાને માને છે રોકસ્ટાર
એશ્ટન એગરે હેટ્રિક સાથે લીધી પાંચ વિકેટ
ઓસ્ટ્રેલિયાનાં ઓલરાઉન્ડર એશ્ટન એગરની હેટ્રિકના દમ પર સાઉથ આફ્રિકાને પહેલી ટી 20માં હાર આપી છે. એગર ઓસ્ટ્રેલિયા તરફથી ટી 20માં હેટ્રિક લેનાર બીજા ખેલાડી બન્યા છે. હેટ્રિક લીધા બાદ એગરે રવીન્દ્ર જાડેજાનાં ખૂબ વખાણ કર્યા. એગરે પોતાની આ ઉપલબ્ધિ બાદ ભારતનાં ઓલરાઉન્ડર જાડેજાને રોકસ્ટાર બતાવ્યા. એટલું જ નહીં જાડેજાને પોતાના ફેવરીટ ક્રિકેટર પણ બતાવ્યા. 26 વર્ષીય એગરે કહ્યું કે ગયા મહીને જ ઓસ્ટ્રેલિયાની ટીમ જયારે ભારતનાં પ્રવાસ પર આવી હતી ત્યારે જાડેજાએ તેમની મદદ કરી હતી.
ટી 20 ક્રિકેટમાં એગરે પોતાનું સર્વશ્રેષ્ઠ પ્રદર્શન કર્યું. તેમણે 24 રન આપીને દક્ષીણ આફ્રિકાનાં પાંચ ખેલાડીઓને પવેલિયન ભેગા કરી દીધા. જેથી ઓસ્ટ્રેલિયા 107 રનથી વિજયી બન્યું. એગરે આજે શ્રેષ્ઠ પ્રદર્શન કરતા પોતાની પહેલી હેટ્રિક લીધી. તેમણે ફાફ ડુપ્લેસીસ, એન્ડીલ ફેલુક્કાયો અને ડેલ સ્ટેનને સતત ત્રણ બોલમાં ભોંયભેગા કરી દીધા.
એગરે કહ્યું કે જાડેજા સાથે વાતચીત કરી ત્યારે તેઓ ખૂબ પ્રભાવિત થયા હતા અને બોલને સ્પિન કરવાની સલાહ પણ આપી હતી. એગરે કહ્યું કે તે જાડેજાની જેમ રમવાનું જ પસંદ કરે છે. જાડેજા તેમના ફેવરીટ ક્રિકેટર છે અને જયારે જાડેજા મેદાન પર રમવા ઉતરે છે ત્યારે હકારાત્મક ઉર્જાઓ ઉત્પન્ન થાય છે. તેઓ બેટિંગ, બોલિંગ અને ફિલ્ડીંગ કરીને એક સારી છાપ છોડે છે.