ક્રિકેટ / પોતાના જ ભાઈનો કેચ પકડવા જતા એસ્ટન અગર થયો લોહી લુહાણ ; જુઓ વીડિઓ 

ડાબોડી સ્પિનર એસ્ટન અગરને કારેન રોલટન ઓવલ સ્ટેડિયમમાં 'માર્શ વન ડે કપ'ની  વેસ્ટર્ન ઓસ્ટ્રેલિયા વિરુદ્ધ સાઉથ ઓસ્ટ્રેલિયાની મેચમાં બેટ્સમેનનો કેચ પકડવા જતા ઇજા પહોંચી હતી. બોલ તેના ચશ્માંને અથડાયો હતો જેથી તૂટી ગયેલા ચશ્માં તેના નાકના ભાગમાં ઘુસી ગયા હતા. 

એસ્ટનના નાના ભાઈ વેસ અગરે શોટ લગાવતા એસ્ટન તેને ઝીલવા મીડ ઓન ઉપર દોડ્યો હતો જ્યાં તે લપસી પડતા દડો તેની બે આંખોની વચ્ચે અથડાયો હતો. બોલ અથડાતા જ એસ્ટન મેદાન પર ઢળી પડ્યો હતો. પોતાના ભાઈને વાગેલું જોઈને વેસ તાત્કાલિક પીચ પરથી દોડીને એસ્ટનને જોવા દોડ્યો હતો. કેમેરામાં સ્પષ્ટ દેખાતું હતું કે એસ્ટનનો ચહેરો લોહીથી ખરડાઈ ગયો હતો.

GRAPHIC CONTENT: Not for the faint-hearted, here is the footage of Agar's knock. Ouch! #MarshCup pic.twitter.com/h6Jj3drPsO

— cricket.com.au (@cricketcomau) November 17, 2019

ટીમના ખેલાડી રિચાર્ડસને તાત્કાલિક મેડિકલ આસિસ્ટન્સ માટે ઈશારો કર્યો હતો અને મેડિકલ ટીમનો ટેકો લઇને એસ્ટન મેદાનની બહાર જતો રહ્યો હતો. 

વેસ અગરે મેચ પછી કહ્યું હતું કે આ ઘટનાથી તે ડગી ગયો હતો. તેણે કહ્યું કે તે ભૂલી ગયો કે પોતે બેટીંગ કરી રહ્યો છે અને તરત જ તે ભાઈને જોવા ધસી ગયો હતો. એસ્ટન ઠીક છે તેમ જાણીને તેને ખૂબ રાહત થઇ હતી.