વિશ્વની નંબર વન મહિલા ટેનિસ ખેલાડી એશલે બાર્ટીએ નિવૃત્તિની જાહેરાત કરીને બધાને ચોંકાવી દીધા છે. ઓસ્ટ્રેલિયાના સ્ટાર ખેલાડીએ 25 વર્ષની ઉંમરે અચાનક ટેનિસને અલવિદા કહી દીધું છે. મહત્વનું છે કે તેણે આ વર્ષે જાન્યુઆરીમાં ઓસ્ટ્રેલિયન ઓપન ટાઈટલ જીતીને ઈતિહાસ રચ્યો હતો.
ઇન્સ્ટાગ્રામ એકાઉન્ટ પર નિવૃત્તિની જાહેરાત
બાર્ટીએ આજે સવારે તેના સત્તાવાર ઇન્સ્ટાગ્રામ એકાઉન્ટ પર એક વીડિયો શેર કરીને નિવૃત્તિની જાહેરાત કરી છે. તેણે લખ્યું, "ટેનિસમાંથી મારી નિવૃત્તિ જાહેરાત કરવાનો આજનો દિવસ મારા માટે મુશ્કેલ અને ભાવનાત્મક દિવસ છે. મને ખબર ન હતી કે આ સમાચાર તમારી સાથે કેવી રીતે શેર કરું તેથી મેં મારા સારા મિત્ર કેસી ડીલુકાને મારી મદદ કરવા કહ્યું. આ રમતે મને જે આપ્યું છે તેના માટે આભારી અને ગર્વ અનુભવું છું. આ પ્રવાસમાં મને સાથ આપનાર દરેકનો આભાર."
બાર્ટીએ વર્ષ 2010 માં પ્રોફેશનલ ટેનિસ રમવાનું શરૂ કર્યું અને પછી માત્ર ચાર વર્ષ પછી બ્રેકની જાહેરાત કરી હતી. ત્યારે બાર્ટીએ કહ્યું કે તે એક સામાન્ય ટીનએજ જેવી જિંદગી જીવવા માંગે છે. એશ્લેએ 2015ની શરૂઆતમાં ઓસ્ટ્રેલિયન મહિલા ક્રિકેટ ટીમને મળ્યા બાદ ક્રિકેટ રમવાનું નક્કી કર્યું હતું. તે બિગ બેશ લીગની ટીમ બ્રિસ્બેન હીટ સાથે જોડાઈ. જોકે તે 9 મેચમાં કંઈ ખાસ કરી શકી ન હતી અને 27 બોલમાં 39 રન તેનો સૌથી મોટો સ્કોર હતો. આ પછી તેણે ટેનિસમાં વાપસી કરવાનું મન બનાવી લીધું. આ વખતે તેનું પુનરાગમન શાનદાર રહ્યું.
બાર્ટીની શાનદાર કારકિર્દી
બાર્ટીએ તેની કારકિર્દીમાં ત્રણ ગ્રાન્ડ સ્લેમ જીત્યા હતા. પહેલા તેણે 2019માં ફ્રેન્ચ ઓપન જીતી હતી. આ પછી તેણે 2021માં વિમ્બલ્ડન અને 2022માં ઓસ્ટ્રેલિયન ઓપન જીતી હતી. બાર્ટી યુએસ ઓપનમાં બે વખત (2018, 2019) ચોથા રાઉન્ડમાંથી બહાર થઈ ગઈ હતી. બાર્ટીએ તેની ટૂંકી કારકિર્દીમાં 15 સિંગલ્સ અને 12 ડબલ્સ ટાઇટલ જીત્યા હતા. તે સતત 114 અઠવાડિયા સુધી ટોચની ખેલાડી રહી. તે વિશ્વની ચોથી ખેલાડી છે જે સતત સૌથી વધુ દિવસો સુધી નંબર વનનું સ્થાન મેળવ્યું છે.