ગુજરાતમાં સ્થાનિક સ્વરાજની ચૂંટણી માટે મતદાન થઈ રહ્યું છે અને વહેલી સવારથી ઘણા જિલ્લાઓમાં લોકોમાં ઉત્સાહ જોવા મળી રહ્યો છે.
ગોધરા નગરપાલિકામાં મતદાન દરમિયાન ખોટકાયું EVM
સુરતના માંડવીમાં મતદાન પ્રક્રિયામાં રુકાવટ
છોટાઉદેપુરમાં મતદાન શરૂ થતા જ ગરબડ
ગુરજાતમાં સ્થાનિક સ્વરાજની ચૂંટણીનો આજે બીજો તબક્કો છે જેમાં જિલ્લા પંચાયત, તાલુકા પંચાયત અને નગરપાલિકા માટે મતદાન કરવામાં આવી રહ્યું છે. જોકે મતદાનમાં વોટિંગની પ્રક્રિયા શરૂ થતાંની સાથે જ EVMમાં ઠેર ઠેર મુશ્કેલીઓ સર્જાઇ છે જેના કારણે લોકોને તકલીફનો સામનો કરવો પડી રહ્યો છે.
માંડવીમાં મતદાન પ્રક્રિયામાં રુકાવટ
સુરતના માંડવીમાં EVM મશીન ખોટકાઈ ગયું હતું. માંડવીના બુથ નંબર 185માં EVM ખોટકાઈ જતાં અધિકારીઓ દોડતા થઈ ગયા હતા અને EVMને રિપેર કરવાની કામગીરી હાથ ધરાઈ છે.
મતદાન શરૂ થતા જ ગરબડ
છોટાઉદેપુરમાં મતદાન શરૂ થતા જ EVMમાં ગરબડ સામે આવી હતી જિલ્લા પંચાયતની ચૂંટણી માટે મતદાન થઈ રહ્યું છે ત્યાં પાવીજેતપુરની પ્રાથમિક શાળામાં EVM ખોટાકાઈ ગયું હતું. મતદાન શરૂ થતાં જ ગરબડ સામે આવતા ચૂંટણીપંચની ટેકનિકલ વિભાગની ટીમ બૂથ પર પહોંચી હતી.
રાત્રે EVM ખોલાયાનો આક્ષેપ
સાબરકાંઠાના વડાલીમાં પોલિંગ ઓફિસરોની કામગીરી સામે આક્ષેપ કરવામાં આવ્યા છે. વડાલી ન.પાના વોર્ડ નં-5માં રાત્રે EVM ખોલાયાનો આક્ષેપ કરવામાં આવ્યો છે. જોકે અધિકારીઓએ નિયમ મુજબ જ કામકાજ થયા હોવાની રજૂઆત કરી રહ્યા છે.
પંચમહાલના ગોધરાની ઘટના
ગોધરા નગરપાલિકામાં મતદાન કરવામાં આવી રહ્યું છે અને વહેલી સવારથી લોકોમાં ઉત્સાહ જોવા મળી રહ્યો છે ત્યારે EVM મશીનો લોકોને નિરાશ કરી રહ્યા છે. ગોધરામાં વોર્ડ નંબર 2માં પણ EVM મશીન ખોટકાઈ ગયું હતું.
આજે રાજ્યભરમાં સ્થાનિક સ્વરાજ્યની ચૂંટણીનું મતદાન થઈ રહ્યું છે. 31 જિલ્લા પંચાયત, 231 તાલુકા પંચાયત અને 81 નગરપાલિકાના મતદારો મત્તાધિકારનો ઉપયોગ કરી રહ્યા છે. જેમાં 81 નગરપાલિકાના 46.89 લાખથી વધુ અને તાલુકા, જિલ્લા પંચાયતના 2.50 કરોડ મતદારો છે. આજે રાજ્યના 4 કરોડ 9 લાખ જેટલા મતદારો ઉમેદવારોના ભાવિનો ફેંસલો કરશે. જિલ્લા અને તાલુકા પંચાયતોમાં 31 હજાર 370 મતદાન મથકો ઉભા કરાયા છે.
રાજ્યમાં 6 હજાર 443 મતદાન મથકો સંવેદનશિલ જાહેર કરાયા છે. 3 હજાર 532 મતદાન મથકો અતિસંવેદનશીલ છે. ગત ચૂંટણીમાં 31માંથી 23 જિલ્લા પંચાયત કોંગ્રેસે કબજે કરી હતી. 31માંથી માત્ર 8 જિલ્લા પંચાયત જ ભાજપના ફાળે આવી હતી. 231 તાલુકા પંચાયતમાંથી 146 કોંગ્રેસ, 85માં ભાજપને જીત મળી હતી. 51 નગરપાલિકામાંથી ભાજપને 37 અને કોંગ્રેસનો 14માં વિજય થયો હતો.
ગુજરાતની 231 તા.પંચાયતની યોજાઇ રહી છે ચૂંટણી
ગુજરાતની 231 તા.પંની ચૂંટણીમાં કુલ 12,265 ઉમેદવારો મેદાને છે. જેમાં ભાજપના 4652, કોંગ્રેસના 4594 ઉમેદવારો ચૂંટણી લડી રહ્યા છે. જ્યારે BSP-255, NCP-61 અને AAPના 1067 ઉમેદવારો મેદાને છે. તો અન્ય પક્ષોના 462 અને 1139 અપક્ષ ઉમેદવારો ચૂંટણી જંગમાં છે.
ગુજરાતની 81 નગરપાલિકામાં યોજાઈ રહી છે ચૂંટણી
રાજ્યભરમાં 81 નગરપાલિકામાં ચૂંટણી યોજાઈ રહી છે. 7 હજાર 245 ઉમેદવારોના ભાવિ EVMમાં કેદ થશે. ભાજપના 2,555 અને કોંગ્રેસના 2,247 ઉમેદવારો મેદાનમાં છે. BSP-109, NCP-88, SP-64 ઉમેદવારો ચૂંટણી લડી રહ્યા છે. AAPના 719 અને અન્ય પક્ષોના 264 અને 1,184 અપક્ષ ઉમેદવારો પણ રણમેદાનમાં છે.
જિલ્લા પંચાયતની ચૂંટણીમાં 2655 ઉમેદવારો મેદાને
રાજ્યની જિલ્લા પંચાયતની ચૂંટણીમાં કુલ 2 હજાર 655 ઉમેદવારો મેદાનમાં છે. જેમાં ભાજપના 954, કોંગ્રેસના 937 ઉમેદવારો મેદાને છે. BSPના 88, NCPના 23, CPI-Mના 3, AAPના 304 ઉમેદવાર છે. જ્યારે અન્ય પક્ષોના 133 અને 209 અપક્ષ ઉમેદવારો રણસંગ્રામમાં છે.
કેટલી બેઠકો બિનહરીફ?
વિવિધ જિલ્લા પંચાયતોની કુલ 25 બેઠકો બિનહરીફ, વિવિધ તાલુકા પંચાયતોની 117 બેઠકો બિનહરીફ, વિવિધ નગરપાલિકાઓની 95 બેઠકો બિનહરીફ થઇ છે.