જેતપુર / ગરમી શરૂ થતા જ લીંબુની ડિમાન્ડમાં ઉછાળો, ભાવે સદી ફટકારી, ખેડૂતોને થશે સીધો ફાયદો

• ગરમીની શરૂઆત થતાં જ લીંબુની માંગમાં વધારો થયો 
• માગમાં સતત વધારો થતાં લીંબુના ભાવમાં ઉછાળો
• ભાવ તો સારા આવે છે પણ ઉત્પાદન ઓછું છે- ખેડૂતો 

ધમધખતો તાપ, અકળાવી દે એવી ગરમી, આકાશમાંથી વરસતી લૂ અને આ કારણે સ્થિતિ એવી બની છે કે ન ઘરમાં રહેવાય કે ન તો બહાર. આવી પરિસ્થિતીમાં દરેક વ્યક્તિને શરીરમાં ઠંડક પંહોચાડતું લીંબુ શરબત કે લીંબુ સોડા યાદ આવે. સાથે જ આપણે બધા જાણીએ છીએ કે સનસ્ટ્રોકથી બચવામાં લીંબુ ઘણું મદદરૂપ છે. એ જ કારણ છે કે ગરમીની શરૂઆત થતાં જ લીંબુની માંગમાં વધારો થવા લાગે છે. 

માગમાં સતત વધારો થતાં લીંબુના ભાવમાં ઉછાળો
હાલ પણ ઉનાળાની શરૂઆત થઈ છે અને એ સાથે જ લીંબુના ભાવમાં વધારો જોવા મળી રહ્યો છે. જણાવી દઈએ કે લીંબુ માર્કેટમાં સ્થાનિક આવક ઓછી આવી રહી છે પણ તેની સામે માગમાં સતત વધારો થતાં હાલ લીંબુના ભાવમાં ભારે ઉછાળો આવ્યો છે. આગામી સમયમાં ઉનાળાની ગરમી વધશે તેમ લીંબુની માગ પણ વધશે જેને લઈ આગામી સમયમાં ભાવવધારો થાય તેવી શક્યતાઓ શેવાય રહી છે.

20 કિલો લીંબુના 1400થી 1500 રૂપિયા મળી રહ્યા
લીંબુના ભાવમાં ધીરે ધીરે ઉછાળો આવી રહ્યો છે આ અંગે જેતપુર માર્કેટિંગ યાર્ડના વેપારીઓ સાથે વાત કરતા તેમણે જણાવ્યું હતું કે ઉનાળામાં લીંબુની માંગ વધારે હોય છે તેની સામે સ્થાનિક આવક ખુબ ઓછી છે. એવામાં હાલ મદ્રાસી લીંબુની આવક થઈ રહી છે. હાલ માંગ વધવાના કારણે લીંબુનો ભાવ પણ વધ્યો છે અને ખેડૂતોને 20 કિલોના 1400થી 1500 રૂપિયા મળી રહ્યા છે. આ સાથે જ સ્થાનિક માર્કેટમાં લીબુંના માંગમાં વધારો થતાં તેના ભાવ 100થી 150 રૂપિયા થઈ ગયા છે. 

આ કારણે લીંબુના ઉત્પાદનમાં મોટો ઘટાડો થયો
ઉનાળામાં દર વર્ષે લીંબુના ભાવમાં ઉછાળો આવે છે અને કોરોના સમયે તો લીંબુના ભાવે રેકોર્ડ તોડી દીધો હતો. એ સમયે લીંબુની ખેતી કરનારા ખેડૂતોને સારો ફાયદો મળ્યો હતો. જો કે આ વર્ષે કુદરત ખેડૂતોની વેરી બન્યા છે. કમોસમી વરસાદ, પવન ઉપરાંત ધુમ્મસ અને વાદળછાયા વાતાવરણના કારણે લીંબુના ઉત્પાદનમાં મોટો ઘટાડો થયો છે. 

ભાવ તો સારા આવે છે પણ ઉત્પાદન ઓછું છે
જો કે આ સારા ભાવનો ફાયદો ખેડૂતોને મળી શકે તેમ નથી કારણ હાલ લીંબુનો ફાલ ઓછો છે. નોંધનીય છે કે આ વર્ષે સતત માઠું, ધુમ્મસ અને વાદળછાયું વાતાવરણ રહેતા લીંબુમાં આવેલો ફાલ ખરી ગયો હતો જેના કારણે ઉત્પાદનમાં ઘણો ઘટાડો થયો છે. આ સાથે જ જેતપુર તાલુકાના કેટલાક ગામમાં ખેડૂતો લીંબુની ખેતી કરે છે અને જેતપુરના ખીરસરા ગામમાં લીંબુનું વાવેતર કરનાર ખેડૂતનું કહેવુ છે કે 'લીંબુના ભાવ તો હાલ સારા મળી રહ્યા છે પણ લીંબુનું ઉત્પાદન ઓછું છે.'