અમેરિકાની ૧૨,૫૮૮ કરોડ ડોલર એટલે કે રૂ. નવ લાખ કરોડની કંપની ઇન્ટરનેશનલ બિઝનેસ મશીન (આઇબીએમ)માં ભારતીય મૂળના અરવિંદ કૃષ્ણાની નવા Chief Executive Officer(સીઇઓ) તરીકે નિમણૂક થઇ છે. અરવિંદ કૃષ્ણા આઇબીએમના વર્તમાન સીઇઓ વર્જિનિયા રોમેટીના અનુગામી બનશે.
આઇબીએમએ ૫૭ વર્ષના ભારતીય અરવિંદ કૃષ્ણાને ૬ એપ્રિલથી સીઇઓની નવી જવાબદારી આપવાની જાહેરાત કરી છે. અત્રે ઉલ્લેખનીય છે કે અરવિંદ કૃષ્ણા હાલ ક્લાઉડ એન્ડ કોગ્નિટિવ સોફ્ટવેર માટે આઇબીએમમાં સિનિયર વાઇસ પ્રેસિડેન્ટ તરીકે કામ કરી રહ્યા છે. તેમની વર્તમાન જવાબદારીમાં આઇબીએમ ક્લાઉડ, આઇબીએમ સિક્યોરિટી અને કોગ્નિટિવ એપ્લિકેશન બિઝનેસ તેમજ આઇબીએમ રિસર્ચનો સમાવેશ થાય છે. અરવિંદ કૃષ્ણા આઇબીએમ સિસ્ટમ અને ટેક્નોલોજી ગ્રૂપના ડેવલપમેન્ટ એન્ડ મેન્યુફેક્ચરિંગ ઓર્ગેનાઇઝેશનના જનરમલ મેનેજર તરીકે પણ રહી ચૂક્યા છે.
તેમણે આઇબીએમના ડેટા સંબંધિત કેટલાય બિઝનેસનું નેતૃત્વ સંભાળ્યું હતું. તેઓ ૧૯૯૦માં આઇબીએમમાં જોડાયા હતા. અરવિંદ કૃષ્ણાની નિમણૂકની જાહેરાત કરતા વર્તમાન સીઇઓ વર્જિનિયા રોમેટીએ જણાવ્યું છે કે આઇબીએમમાં આગામી દોર માટે અરવિંદ કૃષ્ણા બેસ્ટ સીઇઓ છે.
sss
આ ઉપરાંત તેઓ ઘણા સારા ટેક્નોલોજિસ્ટ પણ છે, જેમણે આર્ટિફિશિયલ ઇન્ટેલિજન્સ, ક્લાઉડ, ક્વોન્ટમ કમ્પ્યુટિંગ અને બ્લોક ચેન જેવી મહત્ત્વની ટેક્નોલોજી વિકસાવી છે. અરવિંદ કૃષ્ણાએ આઇઆઇટી કાનપુરમાંથી અંડર ગ્રેજ્યુએટ ડિગ્રી પ્રાપ્ત કરી હતી. ત્યાર બાદ તેમણે યુનિવર્સિટી ઓફ ઇલિનોઇસ, અર્બાના શેમ્પેનથી પીએચડી કર્યું હતું.