અરવલ્લી: રાજ્યના બુટલેગરો કાયદો અને વ્યવસ્થાને ઘોળીને પી ગયા હોય તેવો ઘાટ વર્તમાન સમયમાં જોવા મળી રહ્યો છે. અરવલ્લી જિલ્લામાં દારૂ ઘુસાડવાનો અનોખો પ્રયાસ બુટલેગરોએ કર્યો.
ઓઈલ ટેન્કરની આડમાં વિદેશી દારૂની હેરાફેરી કરતા ગાંધીનગર RR સેલની ટીમે બે બુટલેગરોની ધરપકડ કરી કુલ 709 પેટી દારૂ જપ્ત કર્યો છે. પોલીસે કુલ 25 લાખ 54 હજારનો મુદ્દામાલ જપ્ત કરી આ દિશામાં કાયદેસરની કાર્યવાહી શરૂ કરી છે.
આ ઘટના મામલે મળતી જાણકારી મુજબ ગાંધીનગરની RR સેલની ટીમને રાજ્યમાં દારૂ લવાતો હોવાની બાતમી મળતી તેમણે વોચ ગોઠવી હતી. ત્યારે અરવલ્લી નજીક પસાર થતાં હાઇવે પર પસાર થતાં એક ઓઇલ ટેન્કર પર શંકા જતા તેને અટકાવવામાં આવ્યું હતું.
અટકાવવામાં આવેલ ટેન્કરની તપાસ હાથ ધરાતા ઓઇલ ટેન્કરની આડમાં લવાતા 709 પેટી વિદેશી દારૂના જથ્થાનો પર્દાફાશ કર્યો હતો. આ સાથે જ દારૂ લાવતા 2 બુટલેગરોની પણ RR સેલે ધરપકડ કરી હતી.
ઉલ્લેખનીય છે કે એક તરફ રાજ્યમાં દારૂબંધી છે તેમછતાં કેટલાક અસામાજીક તત્વો કાયદો અને વ્યવસ્થાને ઘોળીને પી ગયા હોય તેમ દારૂને હેરફેર કરતા હોય છે ત્યારે આવા તત્વો સામે પોલીસ ખાતા દ્વારા લાલ આંખ કરવામાં આવે તેવી લોકમાંગ ઉઠવા પામી છે.