આક્ષેપ / લો બોલો! અરવલ્લી જિલ્લા વિકાસ અધિકારીએ ઉઠકબેઠક કરાવી તો મામલો પહોંચ્યો માનવ અધિકાર પંચમાં

• ગુગલ મીટ દરમિયાન મિટિંગમાં ઉઠક બેઠક કરાવાઈ હોવાનો કર્મચારીનો આક્ષેપ 
• ભિલોડામાં ગામતળ નીમ કરવાના મુદ્દે ડીડીઓ ઉશ્કેરાયા હોવાનો આક્ષેપ 
• અપમાન સહન ન થતા કર્મચારીએ માનવ અધિકાર પંચનો આશરો લીધો 

ભિલોડા તાલુકા પંચાયતમાં વિસ્તરણ અધિકારી તરીકે ફરજ બજાવતા કર્મચારીએ જિલ્લા વિકાસ અધિકારી સામે ગામતળ નીમ કરવા મુદ્દે ઉશ્કેરાઈ જઈ ગુગલ મીટ દ્વારા ચાલતી મિટિંગમાં ઉઠક બેઠક કરાવવાની સજા આપી હોવાનો આક્ષેપ કરતા કર્મચારી આલમમાં ચકચાર મચી છે.સમગ્ર મામલે કર્મચારીએ માનવઅધિકાર પંચમાં ઘા નાખતા માનવઅધિકાર પંચે અગ્ર સચિવ અને જિલ્લા કલેક્ટરને તપાસ કરી અહેવાલ આપવા આદેશ કર્યો છે. 

અરવલ્લી જિલ્લાના ભિલોડા તાલુકા પંચાયતમાં વિસ્તરણ અધિકારી તરીકે ફરજ બજાવતા ભીખાભાઇ ઇસ્લામભઈ ચડી નામના કર્મચારી સહીત અન્ય કર્મચારીઓ સાથે જિલ્લા વિકાસ અધિકારીએ 11 જાન્યુઆરીના દિવસે વિડીયો કોન્ફરન્સના માધ્યમથી સાંજે ચાર વાગ્યાથી પાંચ વાગ્યા સુધી એક મીટીંગનું આયોજન કર્યું હતું.

અધિકારીએ આપ્યો જવાબ

જેમાં ભિલોડા તાલુકા પંચાયતમાં વિસ્તરણ અધિકારી તરીકે ફરજ બજાવતા ભીખાભાઇ ચડીનો વારો આવતા જિલ્લા વિકાસ અધિકારી દ્વારા પ્રશ્ન પૂછવામાં આવ્યો હતો કે ભિલોડામાં ગામતળ નીમ કેમ નથી થતું ત્યારે તેના જવાબમાં વિસ્તરણ અધિકારીએ જણાવ્યું હતું કે ભિલોડા મોટા ભાગે ટ્રાયબલ વિસ્તાર છે જેથી ગામતળ નીમ થઇ શકતું નથી.

અધિકારીએ કરાવી ઉઠક બેઠક

અધિકારીની વાત સાંભળી જિલ્લા વિકાસ અધિકારી ગુસ્સે થઇ ગયા હતા અને આ કર્મચારીને ઓન લાઈન મિટિંગ દરમિયાન ઉઠક બેઠક કરવા જણાવ્યું હતું જેથી કર્મચારીએ ઉપલી અધિકારીનો આદેશ માની ઉઠક બેઠક કરી હતી ત્યાર બાદ કર્મચારીને પોતાનું સ્વમાન ઘવાયું હોવાનું જણાતા તેને મિટિંગ બાદના દિવસે માનવ અધિકાર પંચમાં અરજી કરી ન્યાયની માંગણી કરી છે. 

આ અંગે તપાસ શરૂ

એક કર્મચારી દ્વારા આવી ઘટના બની હોવાનો આક્ષેપ જિલ્લા વિકાસ અધિકારી સામે કરવામાં આવતા કર્મચારી આલમમાં ચકચાર મચી છે બીજી તરફ માનવ અધિકાર પાંચ દ્વારા પણ સમગ્ર મામલે અગર સચિવ અને જિલ્લા કલેક્ટરને તપાસ સોંપવામાં આવતા તપાસનો ધમધમાટ શરૂ થયો છે 

જિલ્લા વિકાસ અધિકારી અનિલ ધામેલીયા શું કહે છે?

સમગ્ર મામલે જિલ્લા વિકાસ અધિકારી અનિલ ધામેલીયા નો સંપર્ક કરી પૂછવામાં આવતા તેઓએ જણાવ્યું હતું કે હાલ આ મામલે તપાસ ચાલુ હોઈ હું કઈ પણ કહી શકું તેમ નથી તાપાસ બાદ જે કઈ પણ સામે આવશે તે મીડિયા સામે લાવીશું ત્યારે સવાલ એ થાય છે કે જિલ્લાના ઉચ્ચ કક્ષાના અધિકારી સામે આવી વર્તુણુક કરવાનો આક્ષેપ થાય તે ખુબજ શરમ જનક બાબત કહી શકાય