સાબરકાંઠાના ઇડરના ઝુમસર ગામના આર્મી રેજિમેન્ટમાં પુના ખાતે ફરજ બજાવતા જવાનનું બ્રેઈન હેમરેજ બાદ મોત થયું હતું. ત્યારે આજ રોજ(મંગળવાર) તેમના પાર્થિવ દેહને માદરે વતન લવાયો હતો. તેમને સેનાના જવાનો દ્વારા રાષ્ટ્રીય સન્માન સાથે અંતિમ વિદાય આપવામાં આવી હતી. જોકે આર્મીની ફરજ પૂરી કરવાના 1 વર્ષ પહેલા જ માત્ર 35 વર્ષની ઉંમરમાં જ તેમનું અવસાન થતાં સમગ્ર વિસ્તાર માં શોકમાં છવાઈ હતી.
ઝુમસર ગામના આર્મી જવાનનું આકસ્મિક નિધન
નિધનથી સ્થાનિક વિસ્તારમાં શોકનો માહોલ
પુનામાં બ્રેઇન હેમરેજથી જવાનનું નિધન
સાબરકાંઠાના ઇડર તાલુકાના ઝુમસર ગામના જવાન કેવલભાઈ પટેલ ઇન્ડિયન આર્મી રેજીમેન્ટ 511માં છેલ્લા 16 વર્ષથી ફરજ બજાવતા હતા. જોકે ગતરોજ તેમને અચાનક બ્રેઇન હેમરેજ થતા તેમને સારવાર અર્થે હોસ્પિટલ ખસેડવામાં આવ્યા હતા. બ્રેઇન હેમરેજ બાદ 38 વર્ષીય જવાનને પુનાની આર્મી હોસ્પિટલમાં સારવાર આપવામાં આવી રહી હતી. સારવાર કારગત ન નિવડતા જવાને હોસ્પિટલમાં અંતિમ શ્વાસ લીધા હતા.
આજે તેમના પાર્થિવ દેહને ઇડરના જુમસર ગામે લાવવામાં આવ્યો હતો. તેમની અંતિમ યાત્રામાં લોકોના ટોળાઓ ઉમટી પડ્યા હતા. દેશભક્તિના નારા સાથે પુષ્પો થકી તેમને અંતિમ વિદાય આપવામાં આવી હતી. ગામના સ્મશાનમાં ગાર્ડ ઓફ ઓનર સાથે જવાનના અંતિમ સંસ્કાર કરવામાં આવ્યા હતા.
છેલ્લા 16 વર્ષમાં તેમને જમ્મુ-કાશ્મીર, દિલ્હી અને કલકત્તા સુધી પોતાની ફરજ બજાવી હતી. તેમજ હવે રિટાયરમેન્ટના એક વર્ષ બાકી હતું તે પહેલા જ તેમનું અવસાન થતાં પરિવારજનો સ્થાનિક ગ્રામજનો સહિત સમગ્ર વિસ્તારમાં અરેરાટીનો માહોલ સર્જાયો હતો. કેવલભાઈ પટેલની અચાનક વિદાય સૌ કોઈ માટે દુઃખ દાયક બની રહી છે.