ભારે વરસાદે સમગ્ર વડોદરાને પાણી પાણી કરી દીધું છે ત્યારે હજુ સુધી પાણી ઓસર્યું નથી. જેથી વડોદરામાં હાલ NDRFની 11 ટીમો કાર્યરત છે. ત્યારે હાલ NDRFની ટીમ દ્વારા લોકોના ઘરોમાં પાણી અને જમવાનું મોકલવામાં આવી રહ્યું છે. સાંજ સુધીમાં પાણી ઓસરી જાય તેવી સ્થાનિકો આશા રાખી રહ્યા છે. ત્યારે જો આજે પણ વરસાદ પડશે તો વડોદરાના લોકોની મુશ્કેલીઓ વધી શકે છે. જો કે તમામ સ્થિતિને પહોંચીવળવા માટે NDRFની ટીમ એલર્ટ પર છે. ત્યારે આર્મી જેવાનોનો ટ્રક પાણીમાં ફસાયો હોવાનું સામે આવી રહ્યું છે.
વડોદરામાં આકાશી આફત વચ્ચે આર્મી અને NDRFની સરાહનીય કામગીરી સામે આવી છે. આર્મીના જવાનો લોકોને સ્થળાંતરણમાં મદદ કરી રહ્યાં છે. ત્યારે આર્મીના જવાનોએ લોકોને પોતાની ગાડીમાં નિર્ધારિત સ્થળોએ પહોંચાડ્યા હતા. ટ્રાન્સપોર્ટ સિસ્ટમ બંધ થતા આર્મીની ગાડીઓ દોડાવવામાં આવી હતી. પરંતુ બચાવ કામગીરી માટે આવેલ આર્મીનો ટ્રક જ પાણીમાં ફસાયો હતો.
NDRFના જવાનોએ બે આર્મી જવાનનું કર્યું રેસ્ક્યુ
વડોદરામાં લોકોને બચાવવા માટે ગયેલી આર્મીની ટીમ જ પાણી વચ્ચે ફસાઈ ગઈ છે. વડોદરામાં એટલી હદે પાણી ભરાયા છે કે આર્મીનો ટ્રક પાણીના પ્રવાહમાં ફસાઈ ગયો હતો. આખે આખો ટ્રક પાણીમાં ગરકાવ થઈ ગયો હતો. જેના કારણે NDRFના જવાનોની મદદ લેવામાં આવી હતી. NDRFના જવાનોએ આર્મીના બે જવાનનું રેસ્ક્યું કર્યું હતું. આ બન્ને જવાનો પાણીમાં ફસાયેલા આર્મીના ટ્રકની છત પર આસરો લઈને બેઠા હતા.
મહત્વનું છે કે, રાજ્યમાં વરસાદની પરિસ્થિતિને પગલે ગાંધીનગરમાં સમીક્ષા બેઠકનું આયોજન કરવામાં આવ્યું. ગાંધીનગરમાં સ્ટેટ ડિઝાસ્ટર ખાતે ચીફ સેક્રેટરીની અધ્યક્ષતામાં સમીક્ષા બેઠક યોજાઈ હતી. આ બેઠકમાં વડોદરા અને રાજ્યની સ્થિતિને લઈને ચર્ચા કરવામાં આવી હતી. NDRF, આર્મી, એરફોર્સ અને આરોગ્ય વિભાગના હોદ્દેદારો સાથે ચર્ચા કરાઈ. વડોદરામાં બચાવ અને રાહત કામગીરીનો રિપોર્ટ મેળવ્યો. વડોદરામાં પાણી ઓસરવાનું શરૂ થયુ છે. ત્યારે સફાઈ અને આરોગ્યના કામ શરૂ થશે. તેમજ નિચાણવાળા વિસ્તારમાં લોકોના સ્થળાંતર અંગે પણ બેઠકમાં ચર્ચા કરવામાં આવી.
તો આગામી દિવસોમાં વરસાદની આગાહીને પગલે સુચનો અપાયા છે. આ બેઠકમાં મહેસુલ વિભાગના મુખ્ય અધિક સચિવ અને અધિકારીઓ હાજર રહ્યા હતા. તો રોડ એન્ડ બિલ્ડીંગ અને GEB વિભાગના અધીકારીઓ પણ ઉપસ્થિત રહ્યા હતા. જો કે, હાલ વડોદરામાં ફરીથી વરસાદ શરૂ થતા સફાઈકામ કરવાને લઈને અવઢવ ઊભી થઈ છે.