દોસ્તી દિલ્લગી અને દિવાનગી: શૈલજાની હત્યાની કહાની જાણો આરોપી મેજર નિખીલની જુબાની

ભારતીય સેનામાં મેજર અમિત દ્વિવેદીની પત્ની શૈલ્જા દ્વિવેદીની હત્યા કરી દેવામાં આવી છે. શનિવારે દિલ્હીમાં એમની બોડી જપ્ત કરી દેવામાં આવી હતી. હત્યાના આરોપમાં રવિવારે આર્મી ઓફિસર મેજર નિખિલ હાંડાની ધરપકડ કરવામાં આવી. શૈલ્જાની ઉંમર 35 વર્ષની હતી અને એ મૂળ રૂપથી અમૃતસરની રહેવાસી છે. શૈલ્જા ફેસબુક પર પણ એક્ટિવ રહેતી હતી.

જો કે મળતી માહિતી અનુસાર પોલીસે પણ માત્ર ૨૪ કલાકની અંદર જ હત્યાનો ભેદ ઉકેલી આરોપીની મેરઠથી ધરપકડ કરી દીધી. આરોપી મેજર નિખિલ હાંડાની ધરપકડ બાદ જે વિગતો બહાર આવી છે તેમાં આ કિસ્સો એકતરફી પ્રેમનો હતો. પોતાના નજીકના મિત્ર અને સેનામાં જ મેજર અમિત દ્વિવેદીની પત્ની શૈલજાને હાંડા પ્રેમ કરતા હતા અને જે પહેલેથી જ એક બાળકની માતા શૈલજા સાથે લગ્ન કરવા માગતા હતા શૈલજાએ આમ કરવાની ના પાડતાં તેની ચપ્પાથી હત્યા કરી નાખી. આ આખા કેસને અકસ્માતમાં ફેરવવા માટે મૃતકના શરીરને બે વખત કારથી કચડી નાંખ્યું. જો કે પોલીસને પહેલેથી જ લાગતું હતું કે આ હત્યા છે. મૃતકના પતિએ હાંડા પર શંકા વ્યકત કરી.

પોલીસે આ કેસમાં તપાસ કરતાં શૈલજાના મોબાઇલની સીડીઆર પણ કાઢી. તેમાં સ્પષ્ટતા થઇ કે શનિવારના રોજ ૧૦ થી ૧ વચ્ચે શૈલજાએ મેજર હાંડા સાથે વાતો કરી છે. એટલું જ નહીં આ વર્ષે શૈલજાને હાંડાએ ૩૦૦૦ કોલ કર્યા હતા. સૌથી પહેલાં સુરાગ હોસ્પિટલના સીસીટીવીએ આપ્યા જ્યાં શેલજાને મળવા મેજર નિખિલ આવ્યા હતા. નિખિલ હાંડાની સાથે શૈલજા હોસ્પિટલમાંથી બહાર જતી દેખાઈ રહી હતી.

જે ગાડીમાં શૈલજા હતી તે એક સફેદ કાર હતી.નાગાલેન્ડના દિમાપુરમાં ૨૦૧૫માં મેજર અમિતના પોસ્ટિંગ દરમ્યાન મેજર હાંડા પાડોશી હતા ત્યારે તેઓ શૈલજાની નજીક આવ્યા. પોલીસના મતે ૨૦૧૭થી બંને વચ્ચે ખાસ સંબંધ હતા. બે મહિના પહેલાં મેજર અમિત સ્પેશિયલ કોર્સ માટે પત્ની સહિત દિલ્હી આવ્યા ત્યારે પણ મેજર હાંડા સતત શૈલજાને ફોન કરતા હતા.

જ્યારે ખબર પડી કે મેજર અમિત યુએન પોસ્ટિંગ પર જવાના છે તો તેઓ શૈલજા પર લગ્ન માટે દબાણ કરવા લાગ્યા પરંતુ શૈલજા તૈયાર નહોતી. પોલીસના મતે મેજર હાંડા શૈલજાને મળવા માટે દિમાપુરથી રજા લઇ ૨ જૂનના રોજ આવ્યા હતા. સીસીટીવી પરથી ખબર પડી કે શૈલજા એ કારમાં બેસે છે. મેજર હાંડાની લગ્નની વાતને લઇ ઝઘડો થયો અને મેજરે શૈલજાને ગળું કાપી રહેંસી નાંખી.

શૈલજાને મળવા હોસ્પિટલ ગયા હતા
નિખિલ કાર લઇ આરઆર હોસ્પિટલ પહોંચ્યા. ત્યાં શૈલજા પણ ફિઝિયોથેરાપી કરવા પહોંચી હતી. શૈલજાએ પોતાના ડ્રાઇવરને કહ્યું કે તેઓ તેને કોલ કરીને આવવાનું કહેશે. ત્યાંથી શૈલજા નિખિલની કારમાં બેસીને જતા રહ્યા. આરોપી શૈલજાને કારમાં બેસાડી આરઆર હોસ્પિટલની આસપાસ લઇ ફરતા રહ્યા.

૫૮ સેકન્ડ માટે ફોન ચાલુ કરતાં લોકેશન મળ્યું
દિલ્હીમાં મેજર અમિત દ્વિવેદીના પત્ની શૈલજા દ્વિવેદીની હત્યાના આરોપમાં મેરઠથી મેજર નિખિલ હાંડાની ધરપકડ કરાઇ હતી. તેઓ અખબાર ટીવી પર પળે-પળ અપડેટ લઇ રહ્યા હતા. હત્યા બાદ બંધ કરેલા મોબાઇલને ૫૮ સેકન્ડ માટે ઑન કરતાં જ પોલીસે લોકેશન ટ્રેસ કરી તેમને દબોચી લીધા.