છોટા ઉદેપુર / આરોગ્યમંત્રીના દીકરા બાદ પોલીસનું વધુ એક ઘર્ષણ: માસ્ક ન પહેરવા બદલ આર્મી જવાન અને પોલીસકર્મી આમને સામને

• છોટા ઉદેપુરમાં માસ્ક મામલે બબાલ
• પોલીસ કર્મી અને આર્મી જવાન વચ્ચે ઝપાઝપી
• માસ્ક ન પહેરવા મામલે બબાલ

ગુજરાતમાં કોરોના વાયરસની મહામારીને પહોંચી વળવા માટે હાલ તો રસી કે અન્ય કોઈ નીરાકરણ ન હોવાથી સોશિયલ ડિસ્ટન્સીંગ અને ફરજિયાત માસ્ક અને કરફ્યુ  જેવા નિયમો લાગુ કરવામાં આવ્યા છે ત્યારે વારંવાર પોલીસ અને લોકો વચ્ચે સંઘર્ષ થઈ રહ્યો છે. આરોગ્યમંત્રી કુમાર કાનાણી (kumar kanani )અને મહિલા પોલીસકર્મી સુનિતા યાદવ ( sunita yadav )નો કિસ્સો હજુ તાજો જ છે ત્યાં આર્મીજવાન અને પોલીસના ઘર્ષણની ઘટના સામે આવી છે. 

માસ્ક ન પહેરવા પર 200 રૂપિયા દંડ

માસ્ક ન પહેરવા પર 200 રૂપિયા દંડ કરવામાં આવી રહ્યો છે. છોટાઉદેપુર ( Chhota Udepur )માં પણ આ મામલે પોલીસ અને આર્મી જવાન વચ્ચે ઝપાઝપીની ઘટના સામે આવી છે.આ ઘટનામાં આર્મી જવાન સામે કાયદેસરની કાર્યવાહી હાથ ધરવામાં આવી છે.

પોલીસકર્મીઓ અને આર્મી જવાન વચ્ચે ઉગ્ર બોલાચાલી

આધારભૂત સૂત્રોના જણાવ્યાનુસાર  છોટાઉદેપુર પોલીસે માસ્ક ( mask ) વગર બહાર નીકળેલા બાઇક ચાલકને અટકાવ્યો હતો. બાઇક ચાલકો પોતાની ઓળખ આર્મી જવાબ તરીકે આપી હતી. આ દરમિયાન પોલીસકર્મીઓ અને આર્મી જવાન વચ્ચે ઉગ્ર બોલાચાલી થઈ હતી. પોલીસની કાર્યવાહી સામે વિરોધ નોંધાવીને જવાને હોબાળો મચાવ્યો હતો. જે બાદમાં મામલો ઝપાઝપી સુધી આવી પહોંચ્યો હતો. 

આર્મી જવાન પર કાર્યવાહી

આ મામલે પોલીસે આર્મી જવાન અનિસ રાઠવા સામે કાયદેસરની કાર્યવાહી કરી છે. ઝપાઝપી બાદ પોલીસ આર્મી જવાનને ગાડીમાં બેસાડીને પોલીસ સ્ટેશન લાવી હતી. સમગ્ર બબાબ દરમિયાન આસપાસ લોકો એકઠા થઈ ગયા હતા.