દાદાગીરી / ફરી આવ્યા તો મારી નાંખીશું: દાહોદમાં પોલીસ પર પથ્થરથી હુમલા બાદ ધમકી, 2 જવાન ઘાયલ

• દાહોદના પીપરગોટા ગામે પોલીસ ઉપર હુમલો
• આરોપીને પકડવા ગયેલી પોલીસ ઉપર હુમલો
• હુમલામાં 2 પોલીસકર્મીઓ પણ ઘાયલ

દાહોદ જિલ્લાના ધાનપુર તાલુકાના પીપરગોટા ગામે પોલીસ ઉપર હુમલો કરાયો હોવાની ઘટના સામે આવી છે. પકડ વોરંટ સાથે આરોપીને પકડવા ગયેલી ધાનપુર પોલીસ પર મહિલા સહિત આઠથી દશ લોકોના ટોળાંએ પથ્થર મારો કર્યો હતો. એ સિવાય આરોપીના પરિવારે પોલીસ પર લાકડી, પથ્થર અને ગોફણોથી હુમલો કર્યો હતો. જો કે, આ હુમલામાં 2 પોલીસકર્મીઓ ઘાયલ પણ થયા છે. હુમલો કરનારા લોકોએ પોલીસને 'જો ફરીથી આવશો તો મારી નાખીશું' એવી ધમકી પણ આપી હતી.

પોલીસે 5 લોકો સામે ગુનો દાખલ કર્યો

જો કે, આ ઘટનાને લઇને પોલીસે 5 લોકો સામે ગુનો પણ દાખલ કર્યો છે. તમને જણાવી દઇએ કે, લાકડી, પથ્થર અને ગોફણો લઈને દોડી આવેલા લોકોએ પોલીસ કર્મચારીઓ પર હુમલો કરતા સમગ્ર પંથક સહિત સમગ્ર જિલ્લામાં ભારે ખળભળાટ મચી જવા પામ્યો હતો. આ હુમલામાં કેટલાંક પોલીસ કર્મચારીઓને ઈજા પણ થઈ છે.

વધુમાં જણાવી દઇએ કે, ધાનપુર પોલીસ સ્ટેશન વિસ્તારમાં ફરજ બજાવી રહેલા ASI સહિત તેમની સાથે અન્ય પોલીસ કર્મચારીઓ પકડ વોરંટની બજવણી રૂપે આરોપીની ધરપકડ કરવા ધાનપુર તાલુકાના પીપરગોટા ગામે ગયા હતા. જયાં પીપરગોટા ગામે રહેતો આરોપી તથા તેની સાથેના કેટલાંક ઈસમોનું ટોળું હાથમાં મારક હથિયારો લઇને પોલીસ કર્મચારીઓની નજીક ધસી આવ્યું હતું. બાદમાં તેઓએ પોલીસકર્મીઓ પર હુમલો કર્યો હતો.

આમ, પોલીસ કર્મચારીઓની સરકારી કાયદેસરની કાર્યવાહીમાં અડચણ ઊભી કરી ભારે ધિંગાણું મચાવતા પંથકમાં ખળભળાટ મચી ગયો હતો. જેમાં ઈજાગ્રસ્ત પોલીસ કર્મચારીએ ઉપરોક્ત ઈસમોના ટોળાં વિરૂદ્ધ ધાનપુર પોલીસ મથકે ફરિયાદ નોંધાવતાં પોલીસે તમામ ઈસમોની ધરપકડના ચક્રો ગતિમાન કર્યાં છે.