ઈશારો / POKમાં નવાજૂની કરવાના તૈયારીમાં મોદી સરકાર? IMDના એક પગલાંથી પાકિસ્તાનમાં ફફડાટ

• POK ની પણ હવામાન આગાહી બહાર પાડવામાં આવશે 
• ભારતના આ નિર્ણય બાદ પાકિસ્તાનની સરકારનું મોસમ બગડ્યું 
• હાંફળા-ફાંફળા થયેલા ઈમરાન ખાને ભારત પર લગાવ્યા આરોપ 

દેશમાં હવામાનનું પૂર્વામાન કરતી સંસ્થા ભારતીય મોસમ વિભાગે જમ્મૂ કાશ્મીરને પોતાના હવામાનની આગાહીનો ઉલ્લેખ લદ્દાખ, ગિલગિટ-બાલ્ટીસ્તાન અને મુજફ્ફરાબાદના રૂપમાં આપવાનું શરુ કર્યું છે. નોંધનીય છે કે ગિલગિટ-બાલ્ટીસ્તાન અને મુજફ્ફરાબાદ પાકિસ્તાને કબજે કરી લીધેલ જમ્મુ કાશ્મીરના ભાગ છે. 

પાકિસ્તાનને ઈશારો : 

નોંધનીય છે કે આઈએમડી ઘણા સમયથી રોજબરોજ મોસમ વિભાગની જાણકારી આપતું હતું પરંતુ મંગળવારના રોજ દિલ્હીના મોસમ વિભાગ તરફથી ઉત્તર-પશ્ચિમી ભારત માટે જે પૂર્વાનુમાનની લીસ્ટ જાહેર કરવામાં આવી તે દિવસ જ ફેરફાર દેખાવાના શરુ થઇ ગયા હતા. લદ્દાખને કેન્દ્રશાસિત પ્રદેશ તરીકે દર્શાવવામાં આવ્યું તે તો ઠીક પરંતુ ભારતે POK નું મોસમ વિભાગ અનુમાન જાહેર કરીને પાકિસ્તાનને ઈશારો પણ કરી દીધો છે. જે બાદ ઈમરાન ખાનનું 'હવામાન' પણ ચોક્કસથી બગડ્યું હશે. 

થોડા દિવસ પહેલાં પણ ભારતે આપી હતી ચેતવણી 

નોંધનીય છે કે પાકિસ્તાનની સર્વોચ્ચ અદાલત દ્વારા જાહેર કરવામાં આવ્યું હતું કે ગિલગિટ-બાલ્ટીસ્તાનમાં હવે ચૂંટણી કરાવી શકાય છે. જે બાદ ભારતે તેના પર વિરોધ નોંધાવ્યો હતો. ભારતના વિદેશ વિભાગ દ્વારા કહેવામાં આવ્યું હતું કે ગિલગિટ-બાલ્ટીસ્તાન સહીત સમગ્ર જમ્મુ-કાશ્મીર ભારતનું અભિન્ન અંગ છે. અને વહેલામાં વહેલી તકે પાકિસ્તાને કબ્જાને છોડી દેવું જોઈએ. આટલું જ નહી ભારતે POKમાં લોકો પર થઇ રહેલા શોષણનો મુદ્દો ઉછાળ્યો હતો. ભારતે પોતાના નિવેદનમાં કહ્યું હતું કે પાકિસ્તાન POKમાં માનવાધિકારનું ઉલ્લંઘન અને સતત તેમનું શોષણ કરી રહી છે.  જે બાદ પાકિસ્તાનના વિદેશમંત્રીએ નિવેદન જાહેર કરીને ભારતના મુદ્દાઓને વખોડી કાઢ્યા હતા.  

પાકિસ્તાનના વડાપ્રધાન ઈમરાન ખાન પણ હાંફળા-ફાંફળા થઇ ગયા છે. હજુ તો ભારતે કોઈ મોટા નિર્ણયો લીધા પણ નથી ત્યાં ગભરાયેલા ઈમરાન ખાન ટ્વીટર પર ભારત પર આરોપો લગાવી રહ્યા છે.  ઈમરાન ખાને કહ્યું કે ભારત વર્તમાન તણાવના જવાબના બહાને પાકિસ્તાન પર જુઠ્ઠા આરોપો લગાવશે.