Insurance Tips / શું તમે પણ નવી વીમા પોલિસી ખરીદવા જઈ રહ્યા છો? તો એ પહેલા જાણી લો આ જરૂરી વાતો

• વીમો કે ઈન્શ્યોરન્સ મુખ્યત્વે બે પ્રકારના હોય છે
• વીમા પોલિસી ખરીદતા પહેલા જાણી લો આ વાતો 
• કઈ છે એ બાબતો ચાલો જાણીએ 

વીમો કે ઈન્શ્યોરન્સ તમને કોઈ પણ અણધારી અથવા પ્રતિકૂળ ઘટનાને કારણે થતા આર્થિક નુકસાન માટે વીમા કવર પ્રદાન કરે છે. આ અંતર્ગત તમારે નિયમિત સમયગાળા દરમિયાન વીમા કવર માટે અમુક પ્રીમિયમ જમા કરાવવું પડે છે. આ પ્રિમીયમ માસિક, ત્રિમાસિક અને વાર્ષિક ધોરણે ચૂકવી શકાય છે. જણાવી દઈએ કે તમારા વીમા કવરની રકમ તમારા દ્વારા ચૂકવવામાં આવતા પ્રીમિયમના મૂલ્યના આધારે નક્કી કરવામાં આવે છે. જો ભવિષ્યમાં તમારી સાથે કોઈ અકસ્માત થયો તો આવી પરીસ્થિતિમાં તમને વીમા કવરનો લાભ મળી શકે છે. 

જણાવી દઈએ કે વીમો કે ઈન્શ્યોરન્સ મુખ્યત્વે બે પ્રકારના હોય છે. એક જીવન વીમો એટલે કે લાઈફ ઈન્શ્યોરન્સ અને બીજો સામાન્ય વીમો એટલે કે જનરલ ઈન્શ્યોરન્સ. જો કે આ બંને વીમાના પણ ઘણા પ્રકારો હોય છે. એવામાં કોઈ ખાસ જાણકારી વિના જો તમે વીમા પોલિસી ખરીદવા જઈ રહ્યા છો, તો માટે કેટલીક બાબતો ખાસ ધ્યાન રાખવું જોઈએ, કઈ છે એ બાબતો ચાલો જાણીએ 

જીવન વીમો એટલે કે લાઈફ ઈન્શ્યોરન્સ
જીવન વીમાના પ્રકારોમાં ટર્મ ઈન્સ્યોરન્સ, એન્ડોમેન્ટ પોલિસી અને મની બેક પોલિસી આવે છે. જીવન વીમો એ ઈન્શ્યોરન્સ પ્રોવાઇડર અને વીમો ખરીદનાર વ્યક્તિ વચ્ચેનો એક કરાર છે. તેમાં વીમાધારકના જીવનને કવર કરવામાં આવે છે. આ વીમા હેઠળ જો વીમાધારકનું કમનસીબે મૃત્યુ થાય છે તો આ કિસ્સામાં તેના જીવન વીમા કવરની રકમ તેના નોમિનીને આપવામાં આવે છે. લાઈફ ઈન્શ્યોરન્સ વ્યક્તિની ગેરહાજરીમાં પરિવારને આર્થિક સુરક્ષા આપવાનું કામ કરે છે.

જનરલ ઈન્શ્યોરન્સ એટલે કે સામાન્ય વીમો
જનરલ ઈન્શ્યોરન્સ એટલે કે સામાન્ય વીમામાં સ્વાસ્થ્ય વીમો, મોટર વીમો, હોમ ઈન્શ્યોરન્સ, મુસાફરી વીમો વગેરેનો સમાવેશ થાય છે. આ વીમામા કોઈ ચોક્કસ મિલકત પર ઈન્શ્યોરન્સ પ્રોવાઇડર અને વીમાધારક વચ્ચે કરાર થાય છે. આ વીમામાં વીમા કંપની વીમાધારકની મિલકતને થયેલા નુકસાનની ભરપાઈ કરે છે. જો કે ઘણા આધાર પર આ પોલિસી અલગ અલગ હોય છે. એક તરફ જીવન વીમો વ્યક્તિના જીવનના જોખમને કવર કરે છે તો બીજી બાજુ સામાન્ય વીમો વાહન, ઘર, આરોગ્યને કવર કરવાનું કામ કરે છે. 

તમારી જરૂરિયાત મુજબ તમારે કયો વીમો લેવો એ તમારા પર જ આધારિત છે..