રાજયના અન્ય જિલ્લાઓની માફક કચ્છમાં પણ સરકારી કચેરીઓમાં મેનપાવર પુરો પાડવા માટે મહેસાણાની નીરવ એન્ટરપ્રાઇઝ નામની ખાનગી એજન્સીને આઉટસોર્સીગનો કરાર સોંપ્યો છે. ત્યારે સરકારી કામ કરવા માટે નિમાયેલી ખાનગી એજન્સી સ્ટાફના પગારમાંથી મોટી કટકી કરી તંત્રની આંખમાં ધુળ નાખીને દર મહિને લાખો રૂપિયાનું કૈાભાંડ આચરી કર્મચારીઓનું શોષણ કરતી હોવાની ચોંકાવનારી વિગતો સામે આવી છે.
તંત્રના નાક નીચે આ આખુંય કાંડ આચરાતું હોવા છતાં હજુ સુધી આ એજન્સી સામે કોઇ કાર્યવાહી કરવામાં આવી નથી. ગત જુલાઇ માસની 11મી તારીખે મહેસાણાની નીરવ એન્ટરપ્રાઇઝ નામની ખાનગી એજન્સીએ ડ્રાઇવર માટે 1 પેસો અને કોમ્પ્યુટર ઓપરેટર તેમજ પટાવાળા માટે શુન્ય પૈસાનો સર્વિસ ચાર્જ ચુકવવા પેટે આ કરાર સોંપ્યો હતો.
આકરી શરતોના સાથે આ કરાર અપાયો તે પછી આ ખાનગી એજન્સી તેના હસ્તકના ફાળવાયેલ કર્મચારીઓને લઘુતમ વેતન ધારા મુજબનો પગાર ચુકવવાની બાંહેધરી આપી છે. તેમને નકકી કરાયેલ મુળ વેતનથી ઘણો જ ઓછો પગાર ચુકવી કટકી કાંડ આચરી કર્મચારીઓનું શોષણ કરી રહી હોવા છતાં નિંદ્રાધીન તંત્ર તેનો ખેલ નિહાળી રહ્યું છે.
સામાન્ય માણસ પણ એટલું તો સમજતો હોય કે આકરી શરતોનું પાલન કરી કોઇપણ એજન્સી સાવ પાણીના ભાવે તો ધંધો ન જ કરે. ત્યારે વહિવટીતંત્રે કયા માપદંડને ધ્યાને લઇ મહેસાણાની આ એજન્સીને કરારની સોંપણી કરી તે પણ તપાસનો વિષય છે.
કરારમાં રખાયેલી આકરી શરતો આ મુજબ છે:
- તમામ કર્મચારીઓનો એકસીડન્ટ વિમો ઉતરાવવો
- 3 લાખની સિકયોરીટી ડિપોઝીટની ભરપાઇ કરવી
- એજન્સીની કામગીરી સંતોષકારક ન જણાય કરાર રદ કરી સિકયુરીટી ડિપોઝીટ પણ જપ્ત કરાશે
- વાહનને નુકશાન થાયતો જવાબદારી એજન્સીની રહેશે
- કોમ્પ્યુટર ઓપરેટરને તાલિમ એજન્સીએ પુરી પાડવી
- સરકારી વાહનને કર્મચારી નુકશાન કરે તો નુકશાનીની ભરપાઇ એજન્સી કરે સેવકને યુનીફોર્મ બુટ કેપ આપવાના રહેશે.