સાંભળો સરકાર..! બસની અછત હોવાથી વિદ્યાર્થીઓ કપચી ભરેલા ટ્રકમાં જાય છે શાળાએ

અરવલ્લી: ગતિશીલ ગુજરાતના બણગા ફૂંકતી સરકારની વરવી વાસ્તવિકતા સામે આવી છે. જ્યાં નેતાઓ વિકાસની વાતો કરી રહ્યા છે ત્યાં છેલ્લા કેટલાય દિવસોથી અનેક જિલ્લામાંથી જોખમી મુસાફરીના વીડિયો વાયરલ થઈ રહ્યા છે.

અરવલ્લી જિલ્લામાંથી જોખમી મુસાફરીનો વધુ એક વીડિયો સામે આવ્યો છે. બાયડ તાલુકાના અંતરિયાળ વિસ્તારમાં વિદ્યાર્થીઓ જોખમી મુસાફરી કરી રહ્યા છે.

ઉલ્લેખનીય છે કે આ વીડિયોમાં સ્પષ્ટ જોઈ શકાય છે કે વિદ્યાર્થીઓ કપચી ભરેલા ટ્રકમાં મોતની સવારી કરી રહ્યા છે. આ કપચી ભરેલા ટ્રકમાં બાળકો સ્કૂલમાં જઈ રહ્યા છે. અંતરિયાળ વિસ્તારમાં ST બસોની અછત હોવાથી બાળકો ટ્રકમાં મુસાફરી કરવા મજબૂર બન્યા છે.



આપને જણાવી દઇએ કે બેદરકારી પૂર્વક ચાલતી કપચીની ટ્રકોમાં બાળકોનું મોત થઈ શકે છે. તો સરકારે આવા ગામડાઓમાં ST બસની વ્યવસ્થા કરવી પડે. ત્યારે અહીં સવાલ થાય છે કે શું આ ગામડાઓમાં ST બસની સુવિધા નથી? સરકારે કેમ બસની સુવિધા કરી નથી? શું આવી રીતે ભણશે ગુજરાત? શું આવી રીતે ગુજરાતનો વિકાસ થશે? જેવા તમામ પ્રકારના સવાલો અહી થઈ રહ્યા છે.