પાણીની પળોઝણ / પાણી માટે છે.. ક કિલોમીટર સુધી ભટકતી મહિલાઓની ધીરજ ખૂટી, રસ્તો રોકી જુઓ શું ઉચ્ચારી ચીમકી

• અરવલ્લીના માલપુરમાં પાણી માટે ચક્કાજામ
• વાલ્મિકી ફળિયાના લોકોએ પાણી માટે કર્યો ચક્કાજામ
• ચક્કાજામને કારણે અણિયોર ધનસુરા રોડ પર લાગી વાહનોની લાઈનો

અરવલ્લી પંથકમાં પાણીની પારાયણ જન્મી છે. અરવલ્લી જિલ્લાના માલપુરના અણિયોરમાં પાણી ન મળતું હોવાથી બહેનો પાણી માટે દર દર ભટકી રહી છે. પાણી જેવી પ્રાથમિક સુવિધા માટે સ્થાનિક આગેવાનોને અનેક વખત રજૂઆત કરવા છતાં સમસ્યાનો અંત ન આવતા લોકો રોષે ભરાયા છે. મહિલાઓએ ચક્કાજામ કરી વિરોધ વ્યક્ત કર્યો હતો અને પાણી નહીં મળવા પર રાજકીય નેતાઓને ચૂંટણીમાં પ્રવેશબંધીની ચીમકી પણ ઉચ્ચારી હતી. 

મોટી સંખ્યામાં મહિલાઓ એક કલાક સુધી કર્યો ચક્કાજામ
કાગળ પર વિકાસની હરણફાળ ભરતા ગુજરાતમાં આજે પણ અનેક વિસ્તારો પાણી સહિતની પ્રાથમિક જરૂરીયાત વર્ષોથી ઝંખી રહ્યા છે જે વરવી વાસ્તવિકતા છે. જેનું જીવતું જાગતું ઉદાહરણ અરવલ્લી જિલ્લાના માલપુરના અણિયોરમાં સામે આવ્યું છે. જ્યાં પાણી ન મળતું હોવાથી મહિલાઓએ પાણી ભરવા 1 કિલોમીટર દૂર સુધી જવું પડે છે. વધુમાં મહિલાઓને પોતાના હજારો કામ છોડીને બેડા લઈ એક કિલોમીટર સુધી ભટકવું પડી રહ્યું છે. જેથી અણિયોરના વાલ્મિકી સમાજના લોકોએ પાણી માટે ચક્કાજામ કર્યો હતો. આ તકે મોટી સંખ્યામાં મહિલાઓએ એક કલાક સુધી ચક્કાજામ કરી આક્રોશ ઠાલવ્યો હતો. બીજી તરફ ચક્કાજામને પગલે અણિયોર ધનસુરા રોડ પર વાહનોની લાંબી લાઈનો લાગી હતી. 

નેતાઓને ચૂંટણીમાં પ્રવેશબંધીની ચીમકી
ચક્કાજામને લઇને રોડ પર વાહનોના થપ્પા લાગ્યા હતા અને એક કલાક સુધી વાહનવ્યવહાર ખોરવાયો હતો. ચાલુ વર્ષના અંતે જ્યારે ગુજરાતમાં ચૂંટણી આવી રહી છે ત્યારે આ ગામમાં પાણી નહીં મળવા પર રાજકીય નેતાઓને ચૂંટણીમાં પ્રવેશબંધીની ચીમકી આપી છે. પ્રાથમિક સુવિધા આપવામાં ઊણા ઉતરતા નેતાઓએ મત માંગવા આવવું નહી તેવી ચીમકીને લઈને તંત્ર દોડતું થયુ છે.