ચૂંટણી ટાણે સપાને ઝટકો આપી મુલાયમ પરિવારના વહુએ ભાજપનો કેસરીયો ધારણ કરી લીધો છે. રસપ્રદ વાત એ છે કે, હવે તેના જ જેઠ અખિલેશ સામે મેદાનમાં ઉતરે તેવા સંકેતો છે.
મુલાયમ સિંહનો ગઢ ગણાતા મૈનપુરીની ચારેય સીટ પર જંગ
ચારેય સીટ પર સપાએ ઉમેદવાર ઉતારી દીધા
અખિલેશ સામે ઉમેદવાર શોધવામાં ભાજપ ખાઈ રહ્યું છે ગોથા
હાલમાં ભારતીય જનતા પાર્ટીમાં શામેલ થયેલ મુલાયમ સિંહ યાદવની નાની વહુ અપર્ણા યાદવે પોતાના જેઠ અખિલેશ યાદવ વિરુદ્ધ મૈનપુરીની કરહલ સીટથી મેદાનમાં ઉતરી શકે છે. અખિલેશ સોમવારે ઉમેદવારી પત્ર ભરશે. જ્યારે ભાજપે આ લિસ્ટ માટે અત્યાર સુધી પોતાનો ઉમેદવાર અહીં જાહેર કરી શક્યા નથી. કોંગ્રેસે જ્ઞાનવતી યાદવ અને બીએસપીએ કુલદીપ નારાયણને આ સીટ પરથી ઉમેદવાર બનાવ્યા છે.
મુલાયમ સિંહના ગઢની ચાર સીટ, અખિલેશ સામે મજબૂત ઉમેદવાર શોધી રહ્યું છે ભાજપ
મુલાયમ સિંહ પરિવારનો ગઢ ગણાતા મૈનપુરીની ચારેય સીટ પર ત્રીજા તબક્કામાં 20 ફેબ્રુઆરીએ ચૂંટણી યોજાવાની છે. સપાએ ચારેય સીટ પર ઉમેદવારોની જાહેરાત કરી દીધી છે. તો વળી ભાજપે અત્યાર સુધીમાં ત્રણ સીટો પર ઉમેદવાર ઉતાર્યા છે. કરહલથી ભાજપે અખિલેશ યાદવને ટક્કર આપવા માટે હજૂ ઉમેદવાર શોધી રહ્યા છે. ત્યારે આવા સમયે મૈનપુરી અને આજૂબાજૂના વિસ્તારમાં આ વાતની ચર્ચાએ જોર પકડ્યું છે કે, અપર્ણાને અખિલેશની સામે ટિકિટ આપી શકે છે. ત્યારે આ તમામની વચ્ચે અપર્ણાએ એક ટીવી ચેનલમાં ઈન્ટરવ્યૂ આપતા એ વાતના સંકેતો આપ્યા છે કે, તે પણ કરહલ સીટ પરથી ચૂંટણી લડી શકે છે.
અપર્ણા યાદવે અખિલેશને ટક્કર આપવાના સંકેતો આપ્યા
ભાજપ નેતા અપર્ણા યાદવે કહ્યું કે, જો પાર્ટી કહેશે તો, હું કરહલ સીટ પરથી ચૂંટણી લડવા તૈયાર છું. તેમણે કહ્યું કે, લખનઉ કેંટમાં લોકોની સેવા કરી રહી છું. જો પાર્ટી કહેશો તો, અખિલેશ ભાઈ સામે ચૂંટણી લડીશ. પાર્ટી નક્કી કરશે કે મારે શું કરવાનું છે. અખિલેશ યાદવ વિરુદ્ધ જો અપર્ણા યાદવ ચૂંટણી લડશે તો અહીં ખરાખરીનો જંગ જામશે.
સપા છોડીને ભાજપમાં ગયા મુલાયમ સિંહ પરિવારના વહુ
આ દરમિયાન અપર્ણા યાદવે એવું પણ કહ્યું કે, સપા છોડીને ભાજપમાં આવવાથી મારા સસરા મુલાયમ સિંહ યાદવ નારાજ નથી, તેમણે મને આશીર્વાદ આપ્યા છે. અહીં ઉલ્લેખનીય છે કે, આ ચૂંટણીની સિઝનમાં સમાજવાદી પાર્ટીને ઝટકો આપતા યાદવ પરિવારની વહુ અપર્ણા યાદવે ભારતીય જનતા પાર્ટીમાં જોડાઈ ગયા હતા. અપર્ણા યાદવ 2017માં વિધાનસભા ચૂંટણીમાં સમાજવાદી પાર્ટીની ટિકિટ પરથી લખનઉ કેંટ સીટ પરથી ચૂંટણી લડ્યા હતાં. આ ચૂંટણીમાં તેમને રીતા બહુગુણા જોશીએ હરાવી દીધા હતાં.