ગુજરાતના ગુપ્તચર વિભાગને વધુ મજબૂત બનાવવા પ્રયાસ સાથે 58 આસિસ્ટન્ટ ઇન્ટેલિજન્સ ઓફિસરને નિમણૂક, અલગ-અલગ જીલ્લામાં ખાલી પડેલી જગ્યાઓ હવે ભરાશે
રાજ્યના ગુપ્તચર વિભાગને મજબૂત બનાવવા પ્રયાસ
58 આસિ.ઈન્ટેલિજન્સ ઓફિસરને નિમણૂક
વિવિધ જિલ્લામાં ખાલી પડેલી જગ્યાઓ ભરાશે
ગુજરાતમાં વિધાનસભાની ચૂંટણી અગાઉ સરકારી અધિકારીઓની મોટા પ્રમાણમાં બદલી અને બઢતી થઈ રહી છે. ત્યારે વધુ એક વિભાગના અધિકારીઓની બદલી થઈ છે. રાજ્યના ગુપ્તચર વિભાગને મજબૂત બનાવવાના પ્રયાસ થઈ રહ્યા છે. ત્યારે એકસાથે 58 આસિસ્ટન્ટ ઈન્ટેલિજન્સ ઓફિસરને નિમણૂક આપી દેવાઈ છે. આ અધિકારીઓ ગુજરાતના અલગ-અલગ જિલ્લામાં ફરજ બજાવશે. મહત્વનું છે કે, તહેવારો સહિત ચૂંટણીના સમયમાં આવારા તત્વ અને આતંકી હુમલાઓની માહિતીને લઈ ગુપ્તચર વિભાગ સક્રિય રહેતો હોય છે. અને ગુપ્તચર વિભાગના જમીન પર કામ કરતા અધિકારીઓ પળેપળની માહિતી હેડક્વાટર સુધી પહોંચાડતા હોય છે.
ગુજરાતમાં એકસાથે 58 અધિકારીઓની નિમણૂક
ગુજરાત વિધાનસભાની ચૂંટણી અગાઉ એક સાથે 58 આસિ.ઈન્ટેલિજન્સ ઓફિસરોની જૂનાગઢ, જામનગર સહિતના જિલ્લામાં નિમણૂક કરી દેવાઈ છે. જેની સાથે ગુપ્તચર વિભાગ મજબૂત બન્યો છે. આ સાથે સરહદી જિલ્લાઓમાં પણ હિલચાલ પર આ અધિકારીઓ ધ્યાન રાખશે. સાથે દરિયાઈ જિલ્લાઓમાં પોરબંદર, દ્વારકા જેવા જિલ્લાઓમાં પણ કોઈ ગતિવિધિઓ થઈ રહી છે કે નહીં. તેને લઈ ગુપ્તચર વિભાગ સક્રિય રહેતો હોય છે.
તો ગુજરાતમાં IPS અધિકારીઓની પણ બદલીના ભણકારા
થોડા દિવસ અગાઉ માહિતી સામે આવી હતી કે, ગુજરાતમાં IPSની બદલીઓના ભણકારા વાગી રહ્યા છે. મોટા ભાગના IPSની બદલી થશે તેવી માહિતી સામે આવી હતી. સમગ્ર મામલે IPSના ધારા ધોરણને ધ્યાનમાં રાખીને બદલી કરવામાં આવી શકે છે. સાથે જ દરેક IPSની કામગીરીને જોઈને તેની બદલી કરવામાં આવશે.
ખાસ કરીને IPS ઓફિસરોની કોરોનાકાળમાં કરાયેલી કામગીરી ધ્યાનમાં લેવામાં આવશે. કોરોનાકાળ વખતે મોટા ભાગના IPS ઓફિસરોએ મહત્વની ભૂમીકા ભજવી હતી. ખાસ કરીને લોકડાઉનનું ચુસ્ત પણે પાલન લઈને મોટા ભાગના ઓફિસરોની કામગીરીની નોંધ લેવામાં આવી હતી.