અમેરિકાની ટેક કંપની એપલે ચેટીંગ એપ ટુટોક (totok) ને એપ સ્ટોર પરથી હટાવી દીધી છે. તાજેતરમાં જ એક અહેવાલમાં એવો ઘટસ્ફોટ થયો હતો કે હેકરોએ આ એપનો ઉપયોગ યુઝર્સના ડેટાને ટ્રેક કરવા માટે જાસૂસી ટુલ તરીકે કર્યો હતો. આ એપ્લિકેશનમાં યુઝર્સ ચેટિંગની સાથે સાથે વિડિઓ કોલિંગ પણ કરી શકે છે.
બીજી તરફ નિષ્ણાતોના દાવા પ્રમાણે યુએઈ સરકાર આ એપ્લિકેશન દ્વારા યુઝર્સની જાસૂસી કરતી હતી.ભારતમાં જોકે આ એપ ખાસ પોપ્યુલર નથી. મિડલ ઇસ્ટના દેશો, યુરોપ, એશિયા, આફ્રિકા અને અમેરિકાના લાખો લોકો આ એપનો ઉપયોગ કરો છે અહેવાલો અનુસાર આ એપ્લિકેશન યુઝર્સની મુવમેન્ટ, ચેટ, રિલેશનશીપ, વિડિયો અને ફોટા જેવી માહિતીને સતત ટ્રેક કરે છે.
એપલે કહ્યું છે કે અમે આ એપ્લિકેશનને અમારા પ્લેટફોર્મ પરથી હટાવી દીધી છે અને તેની તપાસ ચાલી રહી છે.ટુટોક ચેટિંગ એપ્લિકેશન યુએઈમાં અને અમેરિકામાં સૌથી વધુ ડાઉનલોડ કરવામાં આવી છે. ન્યૂયોર્ક ટાઇમ્સના અહેવાલ મુજબ આ એપ્લિકેશન બ્રિઝ હોલ્ડિંગ નામની કંપની દ્વારા બનાવવામાં આવી હતી.
આ કંપની અબુધાબીની કમ્પ્યુટર ઇન્ટેલિજન્સ અને હેકિંગ કંપની ડાર્ક મેટર સાથે સંકળાયેલી છે.તેથી એમ કહી શકાય કે બ્રિઝ હોલ્ડિંગે અમેરિકન યુઝર્સનો ડેટા ટ્રેક કર્યો હતો. ગૂગલે પણ આ ચેટિંગ એપને તેના પ્લેટફોર્મ પ્લેસ્ટોર પરથી હટાવી દીધી છે. બ્રિઝ હોલ્ડિંગ કંપનીમાં યુએઈના ગુપ્તચર અધિકારી, નેશનલ સિકયોરિટી ફર્મના પુર્વ કર્મચારીઓ તેમજ સેનાના અધિકારીઓ સામેલ હોવાનું કહેવામાં આવે છે.