અમદાવાદ મેટ્રો ટ્રેનનો ફેઝ-1ના ઉત્તર અને દક્ષિણ છેડાને જોડતો મોટેરા સ્ટેડિયમથી વાસણા APMC સુધીનો રૂટ શરૂ કરી દેવાયો છે. જેને લોકોનો સારો પ્રતિસાદ મળ્યો છે.
અમદાવાદમાં મેટ્રો ટ્રેનના બીજા રૂટ પરના સફરનું સપનું હવે સાકાર થઈ ગયું છે. ગઇકાલથી ફેઝ-1ના ઉત્તર અને દક્ષિણ છેડાને જોડતો મોટેરા સ્ટેડિયમથી વાસણા APMC સુધીની મેટ્રો ટ્રેનનો રૂટ શરૂ થઇ ગયો છે. ત્યારે મેટ્રો ટ્રેનના આ રૂટને પહેલા દિવસે જ બહોળો પ્રતિસાદ મળ્યો છે.
પ્રથમ દિવસે જ 10 હજારથી વધુ લોકોએ કરી મુસાફરી
મેટ્રો ટ્રેનમાં APMC-મોટેરા રુટના પ્રથમ દિવસે ખૂબ મોટી સંખ્યામાં લોકોએ મુસાફરી કરી. પ્રથમ દિવસે જ APMCથી મોટેરા રુટ પર 10 હજારથી વધુ લોકોએ મુસાફરી કરતા પહેલા દિવસે જ દોઢ લાખની આવક થઇ હતી. કોરિડોર-1ના રુટ ઉપર 10 હજાર 149 લોકોએ મુસાફરી કરી.
વાયુ વેગે દોડતી આ મેટ્રો ટ્રેનમાં મોટેરા સ્ટેશનેથી બેસતાં જ સૌથી પહેલા નરેન્દ્ર મોદી સ્ટેડિયમનો અદભુત નજારો ટ્રેનમાંથી જોવા મળી રહ્યો છે. આ અગાઉ ગત 30 સપ્ટેમ્બરે પીએમ નરેન્દ્ર મોદી દ્વારા મેટ્રો રેલ પ્રોજેક્ટના ફેઝ-1ના પૂર્વ અને પશ્ચિમ વિસ્તારને જોડતા થલતેજથી વસ્ત્રાલ ગામના રૂટ શરૂ કરવામાં આવ્યો હતો. ત્યાર બાદ હવે ઉત્તર દક્ષિણ રૂટ શરૂ થઈ જતાં હવે અમદાવાદમાં સંપૂર્ણપણે મેટ્રો ટ્રેન દોડતી થઈ ગઈ છે.
ખૂબ મોટી સંખ્યામાં લોકો મેટ્રોની સવારી માણવા પહોંચ્યા
બીજા તબક્કામાં કોરિડોર-1 વેજલપુર APMCથી મોટેરા સ્ટેડિયમ વચ્ચેના 18 કિમીના રૂટ પર મેટ્રો ટ્રેન સેવાની શરૂઆત થતા ખૂબ મોટી સંખ્યામાં લોકો મેટ્રોની સવારી માણવા પહોંચ્યા હતા. આ દરમ્યાન લોકોએ મેટ્રોમાં સફર કરતા ખુશી સાથે પોતાના અનુભવો પણ જણાવ્યા હતા. અમદાવાદની સૌથી મોટી સમસ્યા વર્ષોથી ટ્રાફિકની રહી છે ત્યારે હવે જાહેર ટ્રાન્સપોર્ટેશનના માધ્યમ તરીકે મેટ્રો ટ્રેનની શરૂઆત થતા લોકોને ટ્રાફિકથી આંશિક રાહત મળશે. ટ્રાફિકની સમસ્યાથી છૂટકારો મેળવવા અને સમય તથા પૈસાનો બચાવ કરવા મેટ્રો ટ્રેન લોકો માટે ખૂબ ઉપયોગી થશે.