જેના માતા પિતા ગુમાવ્યાને થોડો જ ટાઈમ થયો છે, છતાં જે વ્યવસાય સ્વીકાર્યો છે તેને સમર્પિત બની હાલની પરિસ્થિતિમાં અન્ય લોકોના માતા પિતાને મદદરૂપ બનવા સામેથી ડ્યુટી સ્વીકારી છે,તે છે રાજકોટની પી.ડી.યુ. મેડિકલ કોલેજની બીજા વર્ષમાં અભ્યાસ કરતી અપેક્ષા મારડિયા.
અપેક્ષાએ જે કહ્યું તે જાણીને આંખમાં આંસુ આવી જશે
કોરોના સંકટમાં આ પરિસ્થિતિમાં દર્દીઓની સેવા કરતી અપેક્ષાએ કહ્યું કે મારા માતા પિતા હવે રહ્યા નથી, જેનું મને ખુબ જ દુઃખ છે. આ દુ:ખને ભૂલાવીને પણ માનવજાત ઉપર આવી પડેલી આ વિકટ પરિસ્થિતિમાં હું અન્યોને મદદરૂપ થવા માંગુ છું. કોરોના સંક્રમણથી અન્ય લોકોના માતા - પિતાને બચાવીને મારે મારા માતા - પિતાને સાચી શ્રદ્ધાંજલિ આપવી છે.
કોવિડ સેન્ટર પર ફરજ બજાવવાનું કરી દીધું શરૂ
અનેક ગંભીર દર્દીઓનો અને તેમના પરિવારજનોનો જયારે મેડિકલ ટીમ પર ભરોસો છે, ત્યારે તેમની અપેક્ષા પરિપૂર્ણ કરવી જોઈએ, તેવું સમજી તા. ૨૭ એપ્રિલ થી સમરસ કોવીડ સેન્ટર પર ફરજ બજાવવાનું અપેક્ષાએ શરુ કરી દીધું છે. દર્દીઓના રિપોર્ટ્સ, ઓક્સિજન લેવલ ચેક કરવું, દવા આપવી, દર્દીના શિફટિંગ તેમજ અન્ય કામગીરીમાં મદદરૂપ બની રહી છે અપેક્ષા.
નાના ભાઈની જવાબદારી પણ પોતાના શિરે આવી
અપેક્ષાના પિતાજી ૬ એપ્રિલ અને માતા તા. ૧૦ એપ્રિલના રોજ કોરોનાના કારણે અવસાન પામતા તેના પર અપાર દુઃખ આવી પડ્યું, સાથે ૧૦ માં ધોરણમાં ભણતા નાના ભાઈના ઘડતરની પણ મોટી જવાબદારી આવી ચડી છે. આ કપરી પરિસ્થિતિમાં અપેક્ષા ધારત તો ફરજનો અસ્વીકાર કરી શકે તેમ હતી, પરંતુ તેણે ફરજને પ્રાથમિકતા આપી. દુઃખી રહેવાને બદલે દર્દીઓની સારવારમાં જીવ રેડી દીધો હોવાનું સમરસ અધ્યક્ષ ચરણસિંહ ગોહિલ અને સિનિયર ડોક્ટર્સની ટીમ જણાવે છે.
સોશ્યલ મીડિયામાં લોકો કરી રહ્યા છે વખાણ
આમ ખરા અર્થે માં એક બાજુ માતા પિતા ગુમાવ્યાનૉ આધાત અને બીજી બાજુ તબીબી માનવતાના દર્શન આ યુવા તબીબમાં થઈ રહ્યા છે ત્યારે સોશ્યલ મીડિયામાં પણ લોકો ગુજરાતનીઆ આ દીકરીને સો સો સલામ કરી રહ્યા છે.