એક લાંબા બ્રેક બાદ અભિનેત્રી અનુષ્કા શર્મા ફરી એક વખત રૂપેરી પડદે જોવા મળશે. અનુષ્કા શર્માની આતુરતાપૂર્વક રાહ જોવાતી ફિલ્મ 'ચકદા એક્સપ્રેસ'નુ શુટીંગ શરૂ થયુ છે. આ વાતની માહિતી હાલમાં રિલીઝ કરાયેલા ફિલ્મના ફર્સ્ટ લુકની સાથે આપવામાં આવી છે.
અભિનેત્રી અનુષ્કા શર્મા ફરી એક વખત રૂપેરી પડદે જોવા મળશે
અનુષ્કા શર્માની ફિલ્મ 'ચકદા એક્સપ્રેસ'નું શુટીંગ શરૂ થયુ
ફિલ્મમાં અનુષ્કા શર્માએ પ્રસિદ્ધ મહિલા ક્રિકેટર ઝૂલન ગોસ્વામીનું પાત્ર નિભાવ્યું છે. મહત્વનું છે કે, અનુષ્કા શર્માની છેલ્લી ફિલ્મ ઝીરો હતી. જેમાં તે શાહરૂખ ખાનની સામે જોવા મળી હતી. આ ફિલ્મ 2018માં રિલીઝ કરવામાં આવી હતી. જ્યારે ક્રિકેટર વિરાટ કોહલી સાથે લગ્ન કર્યા બાદ આ અભિનેત્રીની પહેલી ફિલ્મ છે. 2017માં લગ્ન બાદ અનુષ્કાએ બોલીવુડમાંથી બ્રેક લીધો હતો.
OTT પ્લેટફોર્મ નેટફ્લિક્સ પર રિલીઝ કરાશે
ઉલ્લેખનીય છે કે અનુષ્કા શર્માની આ ફિલ્મ ઓટીટી પ્લેટફોર્મ નેટફ્લિક્સ પર રિલીઝ કરાશે. ફિલ્મના પ્રોમોમાં અનુષ્કા શર્મા ક્રિકેટર ઝૂલન ગોસ્વામીના પાત્રમાં જોવા મળે છે અને બંગાળી લઢણમાં એક ડાયલોગ કહે છે, જ્યારે જરસી પોતાના નામની નથી તો ચાહકો કોના નામને ફોલો કરશે, પરંતુ ચિંતા ના કરશો. આજે જરસી પર પોતાનું નામ બનાવી લીધુ અને કાલે ઓળખ પણ પ્રસ્થાપિત કરી દઈશું. મીડિયા રિપોર્ટસ મુજબ, મહિલા ક્રિકેટર ઝૂલન ગોસ્વામી એક ફાસ્ટ બોલર રહી છે અને તેના નામે આંતરરાષ્ટ્રીય ક્રિકેટમાં સૌથી વધુ વિકેટ લેવાનો રેકોર્ડ છે.
ફિલ્મનું શૂટીંગ ભારત સહિત યુકેમાં પણ કરાશે
આંતરરાષ્ટ્રીય ક્રિકેટમાં ઝૂલન ગોસ્વામીની કારકિર્દી વર્ષ 2002-2021ની વચ્ચે હતી. અહેવાલ મુજબ, ચકદા એક્સપ્રેસનુ શૂટીંગ ભારત સહિત યુકેમાં પણ કરવામાં આવશે. આ ફિલ્મને અનુષ્કા શર્માના પ્રોડક્શન હાઉસ Clean Slate Filmz દ્વારા પ્રોડ્યુસ કરાઈ રહ્યું છે. આની પહેલા અનુષ્કા એનએચ 10, પરી અને પાતાલ લોક જેવી ચર્ચિત વેબસીરીઝને પ્રોડ્યુસ કરી ચૂકી છે.