કોરોના વાયરસના પ્રકોપને કારણે વિદેશમાંથી આવનારા સેલેબ્સ ખાસ તકેદારી રાખી રહ્યાં છે. હાલમાં જ બોલિવૂ઼ડના દિગ્ગજ એક્ટર અનુપમ ખેર 4 મહિના બાદ ન્યૂયોર્કથી પરત મુંબઈ આવ્યા છે અને આવતાની સાથે જ સેલ્ફ આઈસોલેશનમાં જતા રહ્યાં છે. એક્ટરે સોશિયલ મીડિયા પર એક વીડિયો શેર કરીને આ વાતની જાણકારી આપી છે. અનુપમ ખેરે એરપોર્ટનો વીડિયો શેર કરતાં ત્યાંના અધિકારીઓ અને ભારતની ખૂબ પ્રશંસા કરી હતી.
અનુપમ ખેરે વીડિયો શેર કરતાં લખ્યું- આખરે ચાર મહિના બાદ ન્યૂયોર્કથી પરત મુંબઈ આવ્યો. એરપોર્ટ પર અધિકારીઓ કેટલીક કડકાઈ, વિનમ્રતા અને સક્ષમતા સાથે કોરોનાની સ્થિતિ સામે લડી રહ્યાં છે એ જોઈને ખૂબ જ આનંદ થયો. હકીકતમાં ભારત એક ઉદાહરણ પૂરું પાડી રહ્યું છે કે, સંકટના સમયે કઈ રીતે તેની સામે લડવું જોઈએ. અધિકારીઓ અને લોકો પર ગર્વ છે. જય હો.
વીડિયોમાં અનુપમ ખેરે માસ્ક લગાવ્યો છે. અનુપમ ખેરે વીડિયોના માધ્યમથી લોકોને જાણાવ્યું કે, તમે કોઈ જાણીતી વ્યક્તિ હોવ કે કોઈ સામાન્ય માણસ હોવ એરપોર્ટ પર બધાંની સાથે એક જ જેવો વ્યવહાર થઈ રહ્યો છે. અહીંની સાફ-સફાઈ પણ ખૂબ જ સરસ છે. આ બધાંમાં સૌથી સારી વાત એ છે કે, લોકો પણ નિયમોનું પાલન કરી રહ્યાં છે.
ઉલ્લેખનીય છે કે, અત્યાર સુધી દેશમાં 292 લોકો કોરોનાથી સંક્રમિત હોવાના સમાચાર મળ્યા છે. હવે પ્રધાનમંત્રી મોદીએ રવિવારે જનતા કર્ફ્યૂનું પાલન કરવાની અપીલ કરી છે. મોદીએ કહ્યું, રવિવારે ઘરથી બહાર નીકળવું નહીં. સાથે જ સાંજે બાલ્કનીમાં ઊભા રહીને આ મહામારી સામે લડી રહેલાં લોકોને ધન્યવાદ કરો.