ખેડૂત આંદોલન / ખેડૂત આંદોલનને ઉગ્ર બનાવવાની ખેડૂતોએ કરી તૈયારી, હવે કરશે આ કામ, સરકારનું ટેન્શન વધશે

• કિસાન મોરચાએ નિવેદન બહાર પાડીને કરી જાહેરાત 
• ખેડૂતો મે મહિનામાં સંસદ સુધી કૂચ કાઢશે
• 10 એપ્રિલે કુંડલી-માનસર-પલવલ એક્સપ્રેક્સ વે બ્લોક કરશે

ખેડૂત સંગઠનોની મહત્વની સંસ્થા કિસાન મોરચાએ જણાવ્યું કે સંસદ તરફ આગેકૂચ કરવાની તારીખ થોડા વખતમાં નક્કી કરાશે. આ નિયત તારીખે મોરચો રાજધાની દિલ્હી સ્થિત સંસદ ભવનનો ઘેરાવ કરશે. તે ઉપરાંત 10 એપ્રિલે કુંડલી-માનસર-પલવલ એક્સપ્રેક્સ વે પણ 24 કલાક સુધી બ્લોક કરી દેવામાં આવશે. 

સંયુક્ત કિસાન મોરચાએ એક નિવેદન બહાર પાડીને જણાવ્યું કે ખેડૂતો ઘેરથી પોતપોતાના વાહન લઈને દિલ્હી બોર્ડરે આવશે. ત્યાર બાદ અહીંથી પદયાત્રા કાઢવામાં આવશે. આગામી થોડા સમયમાં તારીખ નક્કી કરવામાં આવશે. 

એનઆરઆઈ લોકો સહાયતા કરી રહ્યાં છે પરંતુ સરકાર દરોડા પાડી રહી છે 

નિવેદનમાં કહેવાયું કે 300 કરતા પણ વધારે ખેડૂતો શહીદ થયા છે. એનઆરઆઈ લોકો સહાયતા કરી રહ્યાં છે પરંતુ સરકાર દરોડા પાડી રહી છે. સંયુક્ત કિસાન મોરચો તેનો વિરોધ કરે છે અને હવે પછી આ સહન નહીં કકરે. સરકાર ખેડૂતોની કોઈ સહાયતા કરી રહી નથી. ખેડૂત આંદોલનને પગલે 4 મહિનાથી જીટી રોડ જામ હોવાને કારણે કુંડલી બોર્ડરની આજુબાજુના સ્થાનિકો અકળાયા છે. ખેડૂતો રસ્તો રોકી બેઠા હોવાથી સ્થાનિકોને બહાર આવવા જવામાં ખૂબ તકલીફ પડી રહી છે. એટલે હવે લોકો જીવ પર આવ્યાં છે અને રસ્તો ખુલ્લો કરવાની માગણી કરવા લાગ્યાં છે. કેટલાક રહીશો તથા ગામલોકો એવી પણ ફરિયાદો કરવા લાગ્યા છે કે કેટલાક આંદોલનકારી નશો કરીને ગાડીઓ અને ટ્રેકટરોમાં મોટા અવાજે ગીતો વગાડીને કોલોનીઓ અને ગામડાઓમાં ફરી રહ્યાં છે. 

ખેડૂત આંદોલનને કારણે 40 કોલોનીઓના લોકોને હાડમારી 

કુંડલી બોર્ડ પર આંદોલનકારીઓ જીટી રોડ જામ કરીને બેઠા છે. આખો રસ્તો બ્લોક હોવાને કારણે હજારો દુકાનદારો, રેહડી ચાલકો, માલ અને બીજી સંસ્થાઓ તથા ઓફિસોના લોકોને જવા આવવામાં તથા કામધંધો કરવામાં ખૂબ જ તકલીફ પડી રહી છે. લગભગ 20 ગામોની 40 કોલોનીઓના લોકોને નાની મોટી અસર પડી છે. લોકો બહાર પણ જઈ શકતા નથી અને જાય છે તો નીકળવું પણ મુશ્કેલ થઈ પડે છે. ઈમરજન્સીની સ્થિતિમાં તો વળી પરિસ્થિતિ વિકટ બને છે. આવી સ્થિતિમાં કામધંધો કેવી રીતે કરવો તે સવાલ લોકોના મનમાં ઘુમરાઈ રહ્યો છે અને તેથી તેમણે હવે ખેડૂત આંદોલનનો વિરોધ કરવાનો વારો આવ્યો છે.