Global Warming / એન્ટાર્કટિકાનું તાપમાન થઇ ગયું શિયાળાના ગુજરાત જેટલું! આટલું વધારે તાપમાન તોડશે વિક્રમો

UNના આબોહવા વિભાગે આ રિસર્ચને અત્યંત ચિંતાજનક ગણાવીને કહ્યું હતું કે બર્ફીલા ખંડ માટે આ ભયજનક સમાચાર છે. આ ખંડના એસ્પેરાન્ઝા બેઝ ઉપર તાપમાન 6 ફેબ્રુઆરીએ 18.3 ડિગ્રી સેલ્સિયસ નોંધાયું હતું.

આ રિસર્ચ ઉપર હાલ વધુ સંશોધન હાથ ધરાયું છે અને ચેક કરાઈ રહ્યું છે કે જો આ ખરેખર સાચો આંકડો છે તો આ ગરમીનો એક નવો રેકોર્ડ પ્રસ્થાપિત કરી દેશે. 

આ વિસ્તારમાં આ પ્રકારની ઘટનાને ‘foehn’ ઘટના કહે છે. આ ઘટનામાં ઢાળ અથવા પર્વતની ખીણમાંથી પસાર થતા પવનો ઝડપથી ગરમ થઇ જાય છે.

વિશ્વ હવામાન વિજ્ઞાન સંગઠન World Meteorological Organization એ એન્ટાર્કટિકા ખંડના ઉત્તર પશ્ચિમ ભાગને જે સાઉથ અમેરિકાથી નજીક છે તેને પૃથ્વીનો સૌથી વધુ ઝડપથી ગરમ થઇ રહેલો ભાગ ગણાવ્યો હતો. અહીં છેલ્લી અડધી સદીમાં 3 ડિગ્રી જેટલું તાપમાન વધી ગયું છે. 

અહીંના જંગી 87% ગ્લેશિયર્સ છેલ્લા 50 વર્ષથી આશ્ચર્યજનક ઝડપે પીગળી રહ્યા છે જેમાં છેલ્લા 12 વર્ષમાં પીગળવાની ઝડપ વિક્રમજનક દરે પહોંચી ગઈ છે.