અરેરાટી / ઘાતક દોરીએ લીધો વધુ એક નો ભોગ, ગાંધીધામના યુવાનનું ગળું ચિરાઈ જતા મોત

• કચ્છના ગાંધીધામમાં દોરી ગળામાં આવી જતાં યુવકનું મોત
• ઇજાગ્રસ્ત યુવાનનું સારવાર મળે તે પહેલા જ મોત
• સુરતમાં પણ યુવાનનું થયું હતું દોરીના પગલે મોત

કાતિલ દોરીને પગલે રાજ્યના અનેક શહેરોમાં ઉતરાયણ લોહીયાળ બની છે. રાજકોટ, વડોદરા, મહેસાણા સહિતના સ્થળોએ દોરીના લીધે ગળા ચિરાઈ જતા યુવાન મોત નિપજયા છે. તેવામાં આજે કચ્છના ગાંધીધામમાં દોરી ગળામાં આવી જતાં યુવકનું ગળું કપાયું હોવાની ઘટના સામે આવી હતી. ઉત્તરાયણના આનંદ વચ્ચે મોતની ચીચીયારીઓ સાંભળવા મળતા પરિજનોમાં અરેરાટી મચી જવા પામી છે.જેને લઈને ઇજાગ્રસ્ત યુવાનને તાત્કાલિક સારવાર માટે રાજકોટ ખાતે ખસેડાયો હતો. જોકે સારવાર મળે તે પહેલા જ રસ્તામાંઆ યુવાનને કાળ આંબી જતા યુવાનનું મોત નીપજ્યું હતું.

સુરતમાં બાઈક લઈ ફરવા નીકળેલ યુવાનનું મોત

આ ઉપરાંત સુરતમાં પણ વધુ એક વખત પતંગની દોરી વધુ એક વખત કાતિલ બની હતી. જેમાં કામરેજમાં પતંગની દોરીના કારણે યુવકને ગંભીર ઇજા થવા પામી હતી. યુવાન બાઈક પર ફરવા નીકળ્યો હતો. આ વેળાએ યુવકના ગળામાં દોરી ફસાતા અકસ્માત સર્જાયો હતો. જેને લઈને યુવાનને ગંભીર ઇજા પહોંચી હતી અને યુવાનનું કમકમાટીભર્યું મોત નીપજ્યું હતું. આથી કામરેજ પોલીસે ઘટનાસ્થળે દોડી જઇ આગળની કાર્યવાહી હાથ ધરી છે. ઉલ્લેખનીય છે કે છેલ્લા 14 દિવસમાં કામરેજમાં દોરીના કારણે 2 લોકોના મોત નિપજયા હોવાનું સામે આવતા ચકચાર મચી છે.

બાળકો સહિત ચારના મોત

ઉલ્લેખનીય છે કે ઉતરાયણના દિવસે રાજ્યમાં પતંગની દોરાના કારણે 4 લોકોના મૃત્યુ નિપજયા હોવાનું જાણવા મળી રહ્યું છે. જેમાં રાજકોટમાં 7 વર્ષીય બાળકનુ ધારદાર દોરીના પગલે મોત થયુ હતું તો મહેસાણામાં પણ 4 વર્ષીય દીકરીનું મૃત્યુ થયુ હતું એ જ રીતે વડોદરા અને સુરતમાં પણ એક-એક યુવકનો કાતિલ દોરીએ ભોગ લીધો હતો.